– Eg tenkte at ho var drepen, sa fastlegen i Trøndelag tingrett tysdag.
Det var ho som melde frå til politiet då ho fekk vete at ektemannen ønska obduksjon.
Dermed starta politiet etterforsking i juli 2023.
Ikkje suicidal, meiner legen
I retten fortalde legen om ein pasient som hadde vanskar med kommunikasjonen og balansen på grunn av Parkinson som ho fekk i 2022.
Men fastlegen oppfatta May Irene Eliassen (73) som ein person som likevel ville leve.
Ektemannen er tiltalt for å ha drepe kona med ein overdose morfintablettar.
Han har forklart at det var kona som ønska å døy på grunn av Parkinson. Avtalen var at han skaffa tablettar, men at ho skulle ta dei når han ikkje visste om det.
Fastlegen oppfatta tiltalte og kona som eit «harmonisk» par. Det verka som mannen tok godt vare på henne, ifølgje legen.
Paret ville ikkje ha hjelp i form av til dømes heimesjukepleie og utdeling av medisinar.
Siste gong ho møtte May var i slutten av mars 2023.
Det var etter den første forgiftinga.
Då verka pasienten nervøs og ikkje så smilande som før, meinte legen.
Morfin på glasa nede i oppvaskmaskina, men ikkje oppe
Det vart funne ei blanding av morfin, alprazolam og klonazepam i kroppen til avdøde. Ho tok maten eller drikka og fekk dermed i seg stoffa i ei slik mengde at ho døydde same dag, ifølgje tiltalen.
Som alternativ til drap er mannen også tiltalt etter paragraf 277 for å ha medverka til at nokon tok livet sitt. Det erkjenner han straffskuld for.
Tysdag fekk retten høyre om det omfattande arbeidet som kriminalteknikarane gjorde då dei undersøkte åstaden i Ørland dagane etter dødsfallet.
Det vart ikkje funne morfintablettar i huset der May Irene Elisassen døydde i juni i fjor.
Men spor etter morfin, alprazolam og klonazepam vart påvist fleire stader, mellom anna i oppvaskmaskina.
Her stod det seks glas. To av dei var blå. Det eine stod i øvste korga, og hadde ikkje spor av morfin på glaskanten.
I den nedste korga stod same type glas der det vart påvist morfinrestar.
Det same galdt eit kvitt fat.
Overbetjent Frode Reiten sa i retten at dersom maskina hadde vorte køyrd, så forventa ein ikkje å finne morfinrestar etterpå.
I vasslåsen i maskina vart det funne restar av alprazolam.
Morfinspor på fleire kjøkenreiskap
Kriminalteknikarane tok ei rekke prøver med bomullsdottar der dei stryk på gjenstandar og overflater. Prøvene blir sende til analyse.
Resultatet viste funn av morfin og/eller alprazolam og klonazepam på bad, stovebord, kjøkenbenk, to steikepanner og steikespadar.
Vidare på eggen av ei saks, fire kjøkenknivar, kjøkenklutar og to pappsugerøyr i søpla.
Tiltalte har tidlegare forklart at han synest det er vanskeleg å svare på om kona brukte sugerøyr i samband med måltid for å få i seg drikke.
På dei tre glasa med morfinspor er det ikkje funne DNA på drikkekanten.
Kvelden kona døydde, skal ho og mannen ha ete ein omelett, ifølgje tiltalte.