Volontjorskaja Rota, ein russisk organisasjon, delte fredag på VKontakte at dei hadde hatt ein aksjon same dag utanfor den norske ambassaden i Moskva. Det skriv iFinnmark.
Det var fire aksjonistar som dukka opp utanfor ambassaden for å minne vesten om frigjeringsinnsatsen til dei sovjetiske styrkane i Europa og Noreg.
Organisasjonen har også delt ein video av aksjonistane som er iførte uniformene til den raude armeen, og marsjerer opp til den norske ambassaden.
– 22. oktober 1944 frigjorde den raude armeen den norske byen Kirkenes, og såg heile Noreg og Europa. Vestlege tenestepersonar ser ut til å ha gløymt dette, og nektar å leggje blomstrar på frigjeringsmonument. Vi kom for å minne på at det er sovjetiske soldatar som ofra seg for å frigjere landet deira. Vesten må hugse dette, seier ei av kvinnene i videoen og som iFinnmark har sitert.
Ifølgje avisa kan namnet til organisasjonen omsetjast til Volunteer Company of the Combat Brotherhood på engelsk. Dei omtaler seg sjølve som ein offentleg organisasjon for unge som har eit mål om patriotisk utdanning og bevaring av historiske minne. Dei kallar seg også for aktivistar.
Mindre protestmarkering
Førre veke vart det markert at det var 79 år sidan Aust-Finnmark vart frigjort. I samband med dette vart ein krans frå Sør-Varanger kommune lagd ned, men like etter vart han dekt til av kransen til den russiske generalkonsulen.
Då stilte ordførar i Sør-Varanger, Magnus Mæland (H), opp og flytta den russiske kransen. Etter dette vart han flytta tilbake igjen av ei russisk kvinne.
Dei fire var kledd i uniformene til den raude armeen.
Foto: Volontjorskaja RotaI innlegget som er lagt ut på VKontakte skriv dei at Mæland hadde fjerna kransen heilt. Det stemmer ikkje. Han flytta han til sides slik at kransen frå Sør-Varanger kommune ikkje vart dekt til.
I forkant av markeringa vart det klart at russisk styresmaktspersonell ikkje var ønskt av fleire lokale personar i Kirkenes.
– Ei plikt
Utanriksdepartementet stadfestar at ei mindre protestmarkering fann stad utanfor ambassaden i Moskva fredag 27. oktober.
– Vi har ingen grunn til å tru at markeringa eller hendinga som utløyste ho vil få ytterlegare konsekvensar for den diplomatiske kontakten med Russland, skriv kommunikasjonsrådgivar i utanriksdepartementet, Guri Solberg.
Den russiske ambassadøren i Noreg, Tejmuraz Ramisjivili, uttalte seg om frigjeringsdagen i Kirkenes.
– Det å heidre minne over soldatar av Den raude armeen som har gitt sitt liv under frigjeringa av Nord-Noreg er ikkje berre rett, men ei plikt av Russlands generalkonsul i Kirkenes, seier Ramisjivili.
