Lekkasje frå FIFA-rapport: Betalte to millionar dollar til 10 år gammal jente

To millionar dollar betalt til den ti år gamle dottera til ein styremedlem i FIFA skal ha vore blant det som skjedde då Qatar fekk tildelt meisterskapet, ifølgje den hemmelege Garcia-rapporten.

Det tyske magasinet Bild offentleggjer deler av rapporten i dag, truleg resten i morgon.

Bild har fått tilgang til Michael Garcias 400 sider store rapport om det som skal ha skjedd i samband med tildelingane av fotball-VM i 2018 til Russland og 2022 til Qatar.

• Artikkelen i Bild (bak betalingsmur)

Ingen bevis, men sterke indikasjonar

Journalist Peter Rossberg i Bild har jobba i to år med å få tak i rapporten. Han seier at det ikkje finst klare bevis for at VM i 2018 og 2022 var kjøpte.

– Men det er så mange sterke indikasjonar, spesielt i tilfellet Qatar, at ein annan konklusjon likevel neppe er mogeleg, meiner Rossberg.

Avgjerda om dei to meisterskapa fall i desember 2010. Men det har heile tida hefta sterke mistankar om korrupsjon og ureint spel ved tildelingane.

Derfor bad FIFA den dåverande leiaren av den etiske komiteen, den amerikanske advokaten Michael Garcia, om å finne ut kva som eigentleg skjedde. Han la fram rapporten sin hausten 2014, men FIFA ville halde han hemmeleg.

I staden publiserte dei eit samandrag av rapporten, der Qatar blei frikjent frå korrupsjonsskuldingane.

Trekte seg i protest

Men Garcia meinte at dette samandraget gav eit feil bilete av hans rapport. Han ville at heile rapporten skulle offentleggjerast, og trekte seg frå alt samarbeid med FIFA i desember 2014. – FIFA manglar leiarskap, sa Garcia då.

Det er Garcias originale rapport Bild no har fått fatt i og vil offentleggjere.

I tillegg til dei to millionar dollarane til den ti år gamle jenta, nemner Bild fleire konkrete tilfelle:

• Qatars idrettsorganisasjon Aspire Academy var «involvert i avgjerande grad i manipulasjonen av FIFA-medlemmer med røysterett», går det fram av Bilds presentasjon av rapporten.
• Tre av FIFAs styremedlemmer reiste også til eit party i Rio før røystinga i 2010. Flyet var ein privat jet tilhøyrande Qatars fotballforbund, ifølgje rapporten. Og alle tre røysta for Qatar.
• Eit tidlegare styremedlem skal ha gratulert Qatar like etter tildelinga i 2010 og takka – på e-post – for «ei overføring av fleire hundre tusen euro», skriv Bild.
• Mannen til ein av dåverande FIFA-president Sepp Blatters nærmaste medarbeidarar skal ha fått kontrakt i Qatar for bygningsfirmaet sitt.

– Puslespel med enormt mange bitar

– Alt dette er eit einaste stort puslespel som berre gir svaret når alle bitane er sett saman. Og i tilfellet Qatar er det ekstremt mange bitar på bordet, skriv Rossberg på Facebook.

– Det ville også vere naivt å tru at Garcia eller Borbély hadde vore i stand til å finne klare bevis, legg Rossberg til.

Cornel Borbély og Hans Joachim-Eckert var leiarar i komiteen fram til mai i år. Men trass i at begge ønskte å halde fram, blei dei ikkje gjenvalde på FIFA-kongressen.

Truleg FIFA-svar i dag

Verken Qatar eller FIFA har kommentert lekkasjane enno. Ifølgje nettstaden sportskeeda.com kjem FIFA til å kome med eit svar i løpet av dagen i dag.