NRK Meny
Normal

Tabben som kunne ha øydelagt alt for Norge

NORGE - UNGARN (3-2): Det som var ein tabbe i laguttaket til EM-kvalifiseringa, kan ha vist seg å ha vore heldig for det norske landslaget i volleyball.

Kristian Bjelland i mottak med Bjarne Nikolai Huus i bakgrunnen

MOTTAK: Kristian Bjelland i mottak med libero Bjarne Nikolai Huus (raud trøye). I bakgrunnen sit mannen som vart vraka frå troppen, Øystein Bergum, på tribunen som tilskodar (grå genser).

Foto: Rune Fossum / NRK

– Det er sjølvsagt ei utfordring for oss, men i dag viste det seg å fungere bra taktisk, seier landslagstrenar Scott Olsen.

Han har nettopp sett Norge slå Ungarn 3-2 (20-25, 21-25, 25-20, 25-17, 15-13) i ein høgdramatisk kamp i Sotra Arena. Fem sett måtte til for å kåre ein vinnar - og det var uhyre jamt og spennande.

Med sigeren heng Norge framleis med i kampen om å gå vidare frå den første kvalikrunden til EM. Med tap hadde det sett mørkt ut. Og det kunne det fort ha gjort.

Kunne ha fått spelte, men...

For Norge kunne ha hatt med seg 14 spelarar i troppen - men har berre 12. Og då libero Yngve Sundfjord måtte kaste inn handkledet med skade, stod landslaget utan ein libero i troppen.

Då var gode råd dyre. Landslagsleiinga valde å flytte kantspelar Bjarne Nikolai Huus inn på libero-plassen. Kristian Bjelland tok over på kanten.

På tribunen sat Øystein Bergum - mannen som kunne ha vore libero om Norge faktisk hadde hatt full tropp tilgjengeleg. Han vart vraka frå 12-mannstroppen rett før fristen.

– Det er skuffande at dei som har ansvaret ikkje har kontroll på reglane. Vi hadde hatt betre moglegheiter med 14 spelarar, for det er alltid ein fordel å ha fleire strengar å spele på, seier Bergum.

Landslagstrenar Scott Olsen i timeout med Norge

HELDIG: Norge kunen ha hatt med to spelarar til i EM-kvalifiseringa. Landslagstrenar Scott Olsen var glad Bjarne Nikolai Huus spelte bra - men ventar med laguttaket mot Israel til i morgon.

Foto: Rune Fossum / NRK

Meiner fleire misforsto reglane

I staden spelte altså Huus. Og det kan ha vist seg å ha vore genialt. For Huus vart bombardert med servar - og løyste oppgåva betre og betre utover i kampen.

– Eg vil av taktiske grunnar ikkje gå inn på detaljar, men det var ein tabbe som slo positivt ut. Når det er sagt, så skal ikkje slike ting skje, vedgår Olsen.

Han understrekar at han forstår reaksjonen til Øystein Bergum.

– Men også Israel og Ungarn må ha mistolka regelverket. Då meiner eg det har meir med reglane enn oss å gjere, seier landslagstrenaren.

Berre England deltek i EM-kvaliken på Sotra med full tropp. NRK får hos turneringsleiaren stadfesta at det er lov med 14 spelarar.

Debuterte i eliten som 15-åring

Uansett regelverk: Bjarne Nikolai Huus spelte ein solid kamp som libero. Ungarn valde å serve konsekvent på sunnfjordingen, som fekk heile 51 servar mot seg i mottak.

– Det er lenge sidan eg har fått så mange ballar på meg. Og det kom seg vel utover i kampen, for det tok litt tid å venne seg til ballen vi brukar her i Europa, seier liberovikaren som til vanleg spelar i USA.

– Kva tenkjer du om at de kunne ha vore fleire i troppen?

– Det tek eg med ro. For meg er det ikkje noko stress å spele libero. Eg debuterte som libero for Førde som 15-åring, smiler Huus.

Mathias Loftesnes i angrep for Norge mot Ungarn

GOD KAMP: Mathias Loftesnes og Norge spelte seg opp utover i kampen, og varta opp med tidvis strålande spel dei to siste setta.

Foto: Rune Fossum / NRK

Kan slå kven som helst

Norge verka nervøse og usikre frå start i kampen, og tapte dei to første setta relativt klart. Så losna det skikkeleg, og spesielt i dei to siste setta var det trøkk over nordmennene.

– Eg har lenge hatt ei kjensle av at det skulle losne snart. Og utover i kampen slo vi oss meir laus, og då kom det gode spelet også. Til slutt var det heilt fantastisk, seier Scott Olsen.

Søndag ventar den siste kampen i kvalikrunden. Då står Israel på den andre banehalvdelen. Det kan bli den tøffaste utfordringa på vegen til andre runde.

– Israel er eit rutinert lag med fleire toppspelarar. Men spelar vi som i dei to siste setta i dag, kan vi ta kven som helst, seier landslagstrenaren.

Siste nytt

  • Hegazi til WBA på permanent basis

    Midtstopperen Ahmed Hegazi har imponert såpass mye i WBA-trøya at klubben har valgt å gjøre om låneavtalen med Al Ahly til en permanent overgang, skriver NTB. Hegazi har spilt samtlige 18 kamper for WBA denne sesongen.

    Hegazi
    Foto: DARREN STAPLES / Reuters
  • Tre strake for Kokslien

    Mikko Kokslien vant tre renn på rad i Colorado i USA i helgens kontinentalcup i kombinert.

    Tre seirer på rad gjør at han også leder kontinentalcupen suverent sammenlagt, melder NTB.

    Holmenkollen skifestival. 10 km. kombinert
    Foto: Berit Roald / NTB scanpix

Sendeplan

Kl. Program Kanal
V-cup alpint: Parallellstorslalåm menn
V-cup alpint: Parallellstorslalåm menn
V-cup alpint: Parallellstorslalåm, menn
V-cup alpint: Parallellstorslalåm menn