– Dette er ein sjanse til å ta nye steg med landslaget, seier Andreas Takvam.
– Alle her drøymer om å spele i EM. Det er difor vi ofrar så mykje tid og pengar på dette, seier Mathias Loftesnes.
Duoen førebur seg saman med det norske landslaget på EM-kvalifisering på heimebane. I storstova Sotra Arena utanfor Bergen er målet å gå vidare frå den første runden - slik dei gjorde det for aller første gong for to år sidan.
Må tilbake til 80-talet
Det er lenge sidan Norge har hatt eit så godt herrelandslag i volleyball. Vi må faktisk heile 30 år tilbake i tid - til den gongen Asbjørn Vølstad og Jan Kvalheim var dei store profilane.
– Vi har aldri hatt ein så jamn og stor stall. Kanskje har enkeltspelarar vore betre, men så mange og så gode på éin gong kan eg ikkje hugse, seier Ivar Bakken.
Han er assistenttrenar på landslaget, og kjenner norsk volleyball på toppnivå betre enn dei aller fleste.
– Vi har hatt nokre stjerner, men ikkje nok gode spelarar rundt dei til at laget var godt nok, seier han.
- Les også:
Trur på EM-deltaking
Norge har aldri hatt eit landslag med i europameisterskapen i volleyball. Laget har aldri eigentleg vore i nærleiken, heller. Men for to år sidan gjekk landslaget vidare til den andre kvalifiseringsrunden - steget før sjølve EM-sluttspelet. Der vart det stopp.
No meiner mange at det er lov å håpe på EM-deltaking.
– Då vi starta med dette for tre år sidan, sa eg til spelarane at generasjonen deira kan skrive historie i norsk volleyball. Og vi var nære på for to år sidan. No skal vi klare å ta det neste steget, seier landslagstrenar Scott Olsen.
– Om ikkje i år, så iallfall innan 2019, seier Ivar Bakken.
Seks har vore profesjonelle
Mykje av forklaringa bak optimismen ligg i det faktum at Norge har og har hatt mange utanlandsproffar dei siste åra. Av dei tolv spelarane som utgjer troppen i EM-kvaliken, har seks av dei erfaring som proffar i utanlandske seriar som Polen, Belgia og USA.
Bjarne Nikolai Huus frå Førde spelar for Long Beach State i den amerikanske collegeserien. Han meiner det har positiv effekt på det norske landslaget.
– Eg trur det er viktig å ta med seg kulturen og mentaliteten frå land der dei verkeleg veit kva som krevst for å spele på høgt nivå, seier Huus.
Andreas Takvam har den siste sesongen vore ein av bærebjelkane på Effector Kielce i Polen. Han ser for seg eit norsk landslag i eit framtidig EM..
– Klarer vi å få ein rein førsteseksar med berre proffar blir det bra. Då går vi til EM, seier han.