Sjakkprofil skulda for å ha bråkete sko: – Høyrdest ut som han hadde på seg støvlar

– Skammeleg framferd av hovuddommar Marghetis mot meg under dagens parti, opnar fransk-iranaren med på X etter partiet.

Desse vekene blir kandidatturneringa spelt i sjakk. Vinnaren får møte regjerande verdsmeister Ding Liren til VM-kamp om tittelen som Magnus Carlsen gav frå seg etter fem triumfar på rad.

I den niande runden møtte Firouzja rutinerte Jan Nepomnjasjtsjij. Midt i djupe tankar om neste trekk, og mens han venta på at motstandaren skulle gjere sitt, reiste Firouzja seg frå brettet og gjekk rundt på området.

Då skal hovuddommaren ha komme bort.

– Midt i partiet, i den mest intense augeblinken, mens eg gjekk rundt under Jans trekk, kom han bort til meg og sa eg ikkje kunne gå rundt meir fordi skoa mine laga for mykje lydar på tregolvet. Han gav meg beskjed om å ikkje gå, og å ta med nye sko i morgon, hevdar Firouzja.

Krev at dommaren blir straffa

Han omtaler skoa som normale dressko, og meiner hendinga gjorde at han mista fokus. Partiet mot Nepomnjasjtsjij enda i remis.

– Desse dresskoa er godkjente, og eg har brukt dei i over eitt år. Dette var ein enorm distraksjon undervegs i kampen, og eg mista fullstendig fokus. Eg sa til ein av arrangørane at dommaren må straffast, skriv Firouzja

Hovuddommar Aris Marghetis bekreftar at han gjekk bort til 20-åringen undervegs i partiet for å snakke om dei bråkete skoa.

Han seier spelehallen i Toronto i Canada er gammal, og at golvet knirka.

– Ein time inn i runden gjekk Firouzja rundt på eit veldig lite område, fram og tilbake. Spelarane gjer det heile tida, og det går ofte fint. Men han gjekk med veldig tunge steg. Det høyrdest ut som han hadde på seg støvlar. Det var som tramping, seier Marghetis til chess.com.

Dommaren fekk skoklage frå spelar

Dommar Marghetis seier han høyrde «trampinga» og blei bekymra over bråket. Så skal andre ha reagert.

– Samtidig kom ein av spelarane og leverte ei offisiell klage. Det var ein av spelarane som sat nærast det området, seier Marghetis.

Spelaren som klaga skal ha vore aserbajdsjanske Nijat Abasov, ifølge dommaren. Dette er ikkje bekrefta av spelaren sjølv.

– Så eg gjekk bort til Firouzja og sa at det har vore ei klage på at han gjekk rundt i området her. Eg foreslo at han kunne spreie området han gjekk rundt på, og at viss han hadde nokon mjukare sko så kunne han prøve å ta dei på i morgon, hevdar Marghetis.

Dommaren seier Firouzja både gjekk mjukare og bråka mindre etter praten. Så skal 20-åringen ha teke opp tråden med dommaren igjen.

– Han gjekk vekk, og kom tilbake nokre minutt seinare. Han er høgare enn meg, og eg kjente han tok ein positur som var ukomfortabel for meg. Han lente seg over meg og sa «Eg kjem kanskje til å levere ei klage, fordi du forstyrra meg» Så gjekk han vekk igjen.

Dette er ikkje første gong Firouzja har laga oppstyr hos dommarane. Kanskje hugsar du denne?

Kalla Carlsens arvtakar

Firouzja var lenge sett på som Magnus Carlsens arvtakar i sjakkverda, til og med av Carlsen sjølv.

Før nordmannen sa frå seg verdsmeistertittelen, heldt han moglegheitene for ein ny VM-kamp open på eitt vilkår:

At Alireza Firouzja blei motstandaren.

Det skjedde likevel ikkje, og dei siste åra har Firouzja brukte meir tid på andre prosjekt enn sjakk.

Nemnde Nepomnjasjtsjij har vunne kandidatturneringa to gongar på rad, og leiar igjen med fem rundar gjenståande å spele. I toppen, med 5,5 poeng av 9 moglege, har han også følge av indiske Gukesh Dommaraju.