Stöckl fornøgd med sluttavtalen: – Har fått fleire jobbtilbod

Seinast i starten av mai varsla Alexander Stöckl eit søksmål mot sin arbeidsgjevar Noregs Skiforbund.

Tidlegare i vinter varsla utøvarane misnøye og at dei ville ha han fjerna som landslagstrenar.

Men no er altså konflikten løyst, slik NRK varsla i formiddag. Seinare i ettermiddag kom forbundet med ei pressemelding som stadfesta dette.

– Eg er veldig nøgd med avtalen. Det har vore krevjande, men vi har kome fram til ein avtale som vi begge er nøgde med, seier Stöckl til NRK.

Han fortel at han har fått fleire tilbod om jobb både i og utanom sporten, men vil ikkje gå i detalj på dette no.

– Eg har ikkje bestemt meg enda, legg han til.

Noregs Skiforbund skriv i ei pressemelding at dei ønsker å takke Stöckl for hans formidable innsats og for dei mange stolte stundene han har skapt saman med utøvarane og støtteapparatet i desse åra.

– Alexander vil bli ståande som ein av dei store i norsk hoppsport, og vi er djupt takknemlege for jobben han har gjort, seier generalsekretær Arne Baumann i NSF.

Stöckl har vore landslagstrenar for hopplandslaget i 13 år, sidan mai 2011.

I pressemeldinga frå forbundet fortel han at han skulle ønske at misnøya som kom til uttrykk frå hopparane hadde blitt handsama annleis.

– Det har vore viktig for meg å bidra til utvikling av både utøvarane, trenarar og støttespelarar. Vi har saman klart å lage mange fantastiske augneblikk i og utanom hoppbakken.

Forbundet vil ta lærdom

Han fortel vidare at han ser tilbake på tida som landslagstrenar som lærerik og at han er takknemleg for alle dei gode minna dei har skapt saman.

– All suksess er eit resultat av eit utmerka samspel i trenarteamet og støtteapparatet, som til einkvar tid har vore oppteken av å stille utøvarane i sentrum.

Generalsekretæren vedgår at prosessen kunne vore betre og at forbundet skal ta lærdom av dette.

– Det synst eg er bra. Men det har vore ein god dialog mellom meg og Baumann heile vegen i prosessen, og eg har stolt på han, fortel han til NRK.

Partane er einige om at dei ikkje vil kommentere innhaldet i avtalen ytterlegare eller prosessen som har ført fram til avtalen.

– På tide

NRKs hoppekspert Johan Remen Evensen er glad for at partane no har kome til einigheit. Han meiner det var på tide med tanke på at VM i Trondheim ligg rett rundt hjørnet.

– Jo før jo betre, i mine auge. No handlar det om å få dei norske hopparane best mogleg før VM på heimebane, og der har dei dårleg tid. Så da er eg letta over at dei no kan kome seg vidare og sjå framover og ikkje krangle meir, seier Evensen.

– Kor mykje skade har denne konflikten gjort?

– Det har nok definitivt vore for mykje bråk rundt hopp og Skiforbundet den siste tida, som heilt sikkert gjer at dei ikkje er det mest attraktive sponsorobjektet akkurat no. Det tek tid å bygge opp att, og så spørst det om det faktisk let seg byggje opp att da. Det vil tida vise.

Remen Evensen er tydeleg på at det no bør leitast innanfor Noregs grenser i jakta på ein ny landslagstrenar for hopplandslaget.

– Eg trur det er mange gode kandidatar i Noreg som kan ta dette vidare. Tidlegare så var ein heilt avhengig av å hente inn kompetanse frå utlandet, både når det kom til utstyr, det tekniske og tankane rundt kva eit godt teknisk skihopp skal vere. Men no tykkjer eg at vi har kome ein lang veg når det gjeld dei tinga her i Noreg.

Les også Prata ut med Stöckl på fest – avslørar nye detaljar om hoppbråket

Konflikt sidan januar

Det var etter VM i skiflyging i Kulm i slutten av januar, at dei mannlege hopparane sende eit brev til Hoppkomiteen i Noregs Skiforbund der dei fortalde om si misnøye og kravde endringar i støtteapparatet med umiddelbar verknad.

Utøvarrepresentant Johann André Forfang skreiv i ein utsegn til NRK at det ikkje handla om resultat, men at dei ynskte å sette saman eit nytt team inn i VM-sesongen som ligg framfor dei.

Alexander Stöckl vart difor bedt om å slutte som landslagstrenar, men takka nei til forhandlingar om ei sluttavtale.

Etter dette var ikkje Alexander Stöckl å sjå på eit einaste hopprenn med det norske landslaget, som trenar.

Stöckl har sagt at han i praksis har oppfatta seg som oppsagt av Skiforbundet – sjølv om han har teke imot løn.

Utover våren kom fleire detaljar om bråket fram, og utøvarrepresentant Forfang sa mellom anna at hopparane har kjend på at støtteapparatet ikkje lenger drog lasset saman.

Det var ikkje Stöckl einig i, da NRK prata med han om det i slutten av mars.

I starten av mai viste det seg at Stöckl hadde varsla eit søksmål mot sin arbeidsgjevar Noregs Skiforbund. Båe partar hadde skaffa seg advokatar for å jobbe med problemstillinga.

Men no skal konflikten altså ha løyst seg, og Alexander Stöckl er ferdig som landslagstrenar for dei norske hopparane. Austerrikaren hadde kontrakt til etter OL i Milano og Cortina i 2026.

Les også Monsterhoppet skaper full splid: – Er ikke i henhold til reglene

13 år

Austerrikaren kom inn som landslagssjef for dei norske hopparane tilbake i mai 2011. Da tok han over for finske Mika Kojonkoski.

NRKs hoppekspert Johan Remen Evensen meiner at Stöckl også har gjort veldig mykje bra for norsk hoppsport.

– Han kom inn som eit friskt pust etter Mika Kojonkoski. Ut ifrå det eg veit, så er han den lengstsittande landslagstrenaren i hopphistoria. Eg har ikkje funne nokon i nyare tid som har vore landslagstrenar lenger enn det han har vore.

– Han har gjort mykje bra, og hatt mykje gode resultat. Vi har i fleire år sakna einaren, men etter kvart fekk vi Halvor Egner Granerud, så det klarte han. Han klarte å vinne hoppveka. Han klarte å «checke» av fleire av dei boksane som vi har sakna i norsk hoppsport. Så det fortener han all ære for.

null

Spiller nå

Stjernen forklarer den mystiske målfeiringen 00:36

Neste

– Jeg orker ikke å se på det engang 00:50 Albania sjokkåpner mot Italia - raskeste målet i EM-historien 03:11 Historisk vidunderbarn herjet i storseier 03:08

Vis flere