Slår tilbake mot Fritz Aanes: – Saknar ingenting

– Personleg har eg utvikla meg meir dei siste tre månadene enn eg har gjort siste året, seier Felix Baldauf.

– Stemninga i gruppa har aldri vore betre enn den har vore nå, seier Exauce Mukubu.

Dei to brytarane er store profilar i NRK-serien «Hodet i klemme» og har fått ein fantastisk start på sesongen. Som første nordmenn i historia tok dei gull i den prestisjefylte verdscupturneringa Dan Kolov Nikola Petrov i klassane sine tidleg i mars.

Det skjer etter ein trøblete slutt på førre sesong med murring mellom utøvarar og trenarar, som enda med at Fritz Aanes og Stig-André Berge trekte seg frå sine stillingar som landslagstrenarar.

I eit lengre intervju med NRK sa Aanes at han «frykta at alt eg har bygd opp ramlar saman i grus» med eit nytt trenarteam. Nå får han kontant svar frå dei tidlegare elevane sine.

– Saknar ingenting

– Heile gruppa synest det er kult å drive med bryting igjen i staden for at alle går rundt og er sur på kvarandre og er lei. Eg trur det opplegget vi har nå er så bra at vi tek medalje i EM, VM og OL, altså, seier Felix Baldauf.

Exauce Mukubu, som bryt finale i U23-EM på onsdag, er ikkje bekymra for at ting skal falle i grus og kontrar med:

– Vi er ganske samstemde når vi seier: «Kva var det eigentleg vi halde med på før?» Det er ikkje sånn det skulle vore. Det mange som har sett seg ned og sagt: «Okei, det er sånn ein gjer det».

Fritz Aanes har fått høyre kommentarane til dei tidlegare elevane sine og ønskjer ikkje å kommentere saka.

På spørsmål om det er noko han saknar med det gamle regimet med Aanes og Berge svarer Baldauf:

– Nei, eg saknar ingenting. Eg saknar Fritz og Stig-André i livet, men eg saknar ikkje systemet vi hadde, det gjer eg ikkje, seier Baldauf, som understrekar at forholdet i dag er bra og at dei har alt på det reine.

Det nye trenarteamet består nå av sportssjef Thor Hyllegaard og trenar Szymon Kogut frå det danske landslaget. Dei samarbeider med Pål-Eirik Gundersen som er assistenttrenar.

– Hald kjeft og sitt ned

Mukubu beskriv forskjellen frå den gamle til den nye trenarordninga på følgjande måte:

– Du har meir kvalitetstrening enn kvantitet. Arbeidet vi legg ned er mindre, men kvaliteten er utruleg mykje betre. Det har aldri vore så mange utøvarar som har vunne så mange kampar så tidleg i sesongen, så eg vil seie at der ser bra ut for sesongen som kjem, seier han.

Baldauf innrømmer at han var skeptisk til det nye danske trenarteamet og kalla dei «digitaltrenarar» ettersom dei ikkje kunne vere til stades i Oslo til kvar tid, men etter ein fantastisk start på sesongen har han snudd.

– Det er heilt enormt gode trenarar, altså. Det samarbeidde og gruppedynamikken vi har, det er heilt utruleg. Det er eit heilt nytt tilvære, eigentleg.

Han meiner nå han har fått ein etterlengta fridom i treninga si i forhold til tidlegare år.

– Ein hadde jo ingen fridom og du måtte følgje opplegget. Bryting vart altoppslukande og det var berre fokus på bryting, til og med i privatlivet. Ein hadde ikkje nokon eigarskap over brytinga, treninga og livet nesten. Ein kjende seg som ei maskin innimellom som følgde ordre.

Baldauf får støtte frå lagkameraten sin Mukubu.

– Tidlegare fekk jo han berre kjeft og vart skulda for å sluntre unna trening da det var kroppen som sa stopp. Nå er det rom for å seie frå når du har vondt og ein kan tilpasse treningsøktene. Før var det berre sånn: «Nei, hald kjeft, sitt ned og gjer det du skal gjere, så er det sånn du blir meister».

Burde avslutta samarbeidet før

Dei to brytestjernene er nå inne i ein sesong med store ambisjonar. Mukubu forventar å ta gull i U23- og senior-EM, som er om tre veker. I haust ventar høgdepunktet i sesongen med VM i Serbia.

– Eg skal vinne EM og for VM har eg eit mål om å bli topp fem. Då får eg nemleg ein OL-billett. Då kan eg seie meg godt fornøgd og så kan eg jobbe vidare mot OL, seier Mukubu.

– Eg har eigentleg bestemt meg for at eg skal ta medalje i EM som ein liten milepæl nå. Det vil vere eit viktig sjølvtillitsløft inn mot VM i haust, seier Baldauf, som vart europameister i 2017.

Mukubu har aldri sett lysare på framtida og meiner pila kunne snudd tidlegare om trenarteamet hadde vorte bytta ut før.

– Eg vil tru det, faktisk. Om ting hadde vorte gjorde annleis for fleire år tilbake da nokre av desse problema hadde dukka opp, hadde minst to kvalifisert seg til OL i 2020 i mine auge, seier Mukubu.

Han bryt EM-finale onsdag klokka 17. Om det blir gull skal profilen ta på seg vikinghjelm.

– Eg tek med vikinghjelmen for å vise at vi skal setje Noreg på kartet. Vikingane er tilbake, seier Mukubu.