– Ved ein rutinekontroll i dag vart det oppdaga ein feil ved ei fuge igjen. Difor må vi gå til det skritt å redusere hastigheita og starte reparasjonarbeidet klokka 19 i kveld. Vi kjem til å stengje det eine køyrefeltet, seier byggjeleiar i Statens vegvesen, Harald Roland til NRK.
Reduserer farten
Allereie i ettermiddag vart fartsgrensa redusert til 40 kilometer i timen.
– Feilen har ingen konsekvensar knytt til bæreevna til brua. Dette er for å oppta bevegelse i brua i lengderetning. Då er det ei stålplate som dekkjer over fuga. Det er denne som er skuld i dette, seier han.
For litt over to veker sidan, då vegvesenet dreiv ein tilsvarande reparasjon, vart det store køar ut av Kristiansand. Det trur han ein vil unngå denne gang.
– Må sjå omfanget
– Slik det har sett ut i rushtida ser det ut til å gå veldig bra. Når sjølve arbeidet startar opp klokka 19 er trafikken mindre. Når vi får opna opp og sett omfanget vil vi finne ut om vi rekk å reparere dette i løpet av natta. Skulle vi ha behov for å jobbe utover laurdag vil vi gjere det. Då er trafikken uansett lågare enn i vekedagane, seier han.