– Kvar enkelt siger er eit nytt steg mot det store målet mitt, seier Havnaa til NRK.
Boksaren frå Risør har tidlegare uttalt at hans store mål er å bli verdsmeister.
Dei to siste kampane har han vunne på knockout. Laurdag skal han i aksjon igjen under Nordic Fight Night i Frederikshavn.
Ventar tøff kamp
– Eg føler meg veldig bra. Eg har gjort jobben som må gjerast. Eg har trent hardt og føler meg sterkare enn nokon gong, seier han.
Han møter Istvan Kun frå Ungarn. Han har vunne fire av ni proffkampar til no,
– Han er veldig tøff og toler mykje. Men eg er i god form og er klar for alt som måtte møte meg. Det kjem garantert til å bli ein tøff kamp der eg startar litt rolegare enn han, og så aukar eg tempo etter kvart, seier Havnaa.
Nervøs proffdebut
Det er under eitt år sidan sørlendingen debuterte i proffsamanheng. 29. november i fjor tok han sin første siger i proffdebuten.
– Det var ein spesiell kamp med mykje nervar. No er eg mykje rolegare. Då var alt nytt og det var mykje spenning. Nå veit eg meir kva eg går til, seier han.
Fredag kveld gjekk dei to boksarane på vekta. Den viste 90,4 for Havna og 89 kilo for den ungarske motstandaren.