Det er i samband med planlegginga av E39 Byrkjelo-Grodås at planane no er lagt fram.
På grunn av større lengde og auka krav til stabilitet, vil vegen få fire køyrefelt over brua, med forbikøyringsfelt.
– Den nye brua vil bli lang og ha eit hovudspenn på cirka 1.550 meter. Det betyr at brua må ha ei viss breidde for å ta det spennet. Den breidda får vi med fire felt, seier prosjektleiar Ellen Njøs Slinde i Statens vegvesen.
På begge sider av fjorden vil vegen gå direkte frå brua og inn i tunnel. Brufundamentet på sørsida står på dagens fylkesveg 60. Denne vegen vil, når brua blir bygd, bli lagt i tunnel bak brutårnet.
Ikkje laga kostnadsoverslag
Njøs Slinde kan ikkje enno seie noko om kva brua, slik den står fram på dei nye planane, vil koste.
– Brua er ein del av eit lengre planleggingsarbeid, og vi har kome godt i gong med planlegginga av brua, men det står igjen ein del planarbeid på heile strekninga. Kostnadsoverslaget for heile strekninga kjem vi til å jobbe med våren 2018, seier ho.
Njøs Slinde kan heller ikkje seie noko om kva sjølve brua vil koste.
– Vi tek kostnadsjobben samla og gjer ein grundig jobb der vi tenker både på vegar, tunnelar og dei andre bruene som er med i prosjektet.
– Halverer strekninga
Planlegging av tunnelar og vegar i Byrkjelo, Utvik, Innvik, Markane og Hornindal i samband med prosjektet er også i gong og blir lagt fram seinare.
Den nye E39-strekninga mellom Byrkjelo og Grodås vil halvere lengda på strekninga, og korte ned reisetida til under det halve, hevdar pressemeldinga frå Statens vegvesen.
- Les meir:
Forslaget om bruløysinga skal leggast fram for offentleg ettersyn til kommunedelplan og konsekvensutgreiing sommaren 2018. Planen er at forslaget kan vedtakast i dei tre gjeldande kommunane vinteren 18/19.