Nordic Mining overraska over nei - men Giske trur på «ja» til Engebø

– Dette kom overraskande på oss. No skal vi først setje oss nøye inn i brevet og så skal vi drøfte kva det betyr og kva vi skal gjere, seier direktør i Nordic Mining, Ivar Fossum til nrk.no.

Selskapet Nordic Mining vil utvinne mineralet rutil i Engebøfjellet i Naustdal. Mineralet blir mellom anna nytta som kvitningsstoff i til dømes tannkrem og måling.

Idag kom svaret frå Miljøverndepartementet der dei førebels seier nei til planane om gruvedrift i Engebøfjellet i Vevring. Grunnen er at dei vil vite meir om konsekvensane for miljøet.

• LES OGSÅ: Minister sa nei til gruvedrift - innbyggjarar feira med fiskekaker
• LES OGSÅ: Seier nei til gruvedrift i Vevring

Nordic Mining har venta lenge på svar og departementet har brukt halvanna år på å handsame planane.

(Artikkelen held fram under video)

Skapar hindringar

Fossum meiner dette berer preg av å skape hindringar for etableringa og seier dei har gjennomført den mest omfattande og breiaste konsekvensutgreiinga i denne industrien nokon gong.

– Vårt umiddelbare inntrykk er at vi synest brevet berer preg av å skape mest muleg hindringar for eit langsiktig, både økonomisk og miljømessig berekraftig industriprosjekt, seier ein skuffa Fossum.

• LES OGSÅ: Veit ikkje kor tid avgjerda kjem
• LES OGSÅ: – Vi kan ikkje la Nordic Mining vente lenger på avgjerda

Næringsfiendtleg

Fossum er forundra over at beskjeden kjem på ein dag der regjeringa legg fram ein offensiv strategi for denne næring.

– Dette gir eit veldig negativt signal og grensar til næringsfiendtleg i ein sektor som regjeringa sjølv ønskjer å la vekse, seier han.

Kva konsekvens dette får for prosjektet til Nordic Mining tykkjer han er for tidleg å svare på.

– Kor lenge vil de vente på ei endeleg avgjerd?

– Det er eit krevjande spørsmål å svare raskt på, så det får vi komme tilbake til, seier Fossum til nrk.no.

• LES OGSÅ: Navarsete meiner ein må tole minussidene ved gruvedrift
• LES OGSÅ: Høgre seier ja til gruvedrift

Giske trur på ja

I ei pressemelding frå Nærings- og handelsdepartementet uttalar Trond Giske følgjande om Nordic Minings prosjekt i Engebøfjellet:

– Engebø er eit stort og viktig mineralprosjekt som kan gi grunnlag for mange viktige distriktsarbeidsplassar og positiv næringsutvikling i Naustdal-regionen.

Giske seier også at det samstundes er viktig at avgjersler knytt til mineraluttak og deponeringsløysingar vert basert på eit godt fagleg grunnlag.

Miljøverndepartementet har bedt om at enkelte forhold må utgreiast nærmare før endeleg avgjerd.

– Eg er optimistisk på at desse undersøkingane vil gje eit miljømessig godt grunnlag for eit ja til sjødeponi, seier Giske.

Må lære av saka

Nærings- og handelsministeren meiner samstundes at dei bør ta lærdom av Engebø-saka.

– Det er viktig at alle relevante forhold identifiserast i ein tidleg fase slik at ein unngår unødig lange prosessar, seier han.

Han meiner at å vere føreseieleg og ha effektiv saksbehandling er sentral i den nye mineralstrategien.

• LES OGSÅ: - Gruverapporten endrar ikkje noko
• LES OGSÅ: Lødemel vil ha gruvedrift i Vevring