– Viss vi ser på kor mykje vi omset syltetøy for ute i dei norske butikkane, så utgjer den delen vi mister vel ein tredjedel av det. Det er alvorleg for oss, fortel Trine Lerum Hjellhaug i Lerum.
Utanfor lokala på Kaupanger som i dag husar all saftproduksjon går gravemaskinene for fullt. Og snart skal syltetøyproduksjonen også skje her. Selskapet har investert 250 millionar i anlegget, og no har dei mista ein av sine viktigaste kundar. Tysdag vart det klart at matvaregiganten droppar alt syltetøy frå Lerum i butikkar utanfor Sogn og Fjordane.
– I løpet av eit år skal vi bygge opp ny syltetøyfabrikk og flytte all produksjon hit, seier den administrerande direktøren.
Samstundes fortel ho at selskapet får halde fram å produsere Rema 1000 sitt eige syltetøy på 1-kilos spann.
– Vi er glade for at vi får halde fram med det. Det er ulike oppskrifter på dei, og vi eig rettane til kvar våre. Det er ulik samansetnad og innhald, seier ho.
– Lerum vil fortsette å produsera fleire av våre bestseljarar i EMV-syltetøy i variantane jordbær, bringebær, tyttebær, blåbær og appelsin. Desse vert å finne i alle våre butikkar, seier administrerande direktør for kategori og innkjøp i Rema 1000, Lars Kristian Lindberg.
Glad for forbrukarstøtte
Sidan nyhenda kom har det kokt på sosiale medium og i kommentarfelta. Sp-politikar Liv Signe Navarsete sver på at ho aldri meir skal sette sin for i ein Rema 1000 butikk utan Lerum produkt. Statsminister Erna Solberg ber folk bruke forbrukarmakta si, og på gata i Sogn erklært forbrukarane si støtte til den tradisjonsrike verksemda.
– Dette er galskap, eg kjem i alle fall ikkje til å handle noko på Rema 1000 om dette blir resultatet, sa Odd Urdal Bjelle i Sogndal til NRK.
Kva konsekvensane blir for selskapet og dei tilsette er framleis for tidleg å seie noko konkret om. På fabrikkgolvet på Kaupanger gler dei tilsette seg over støtta.
– Det er flott at folk engasjerer seg, seier Arvid Uglane, som har arbeid hjå Lerum i 25 år.
Sjølv om framtida er uviss er sjefen klar på at dei skal satse vidare framover. Allereie i februar slepp dei nye produkt på marknaden.
– Engasjementet syner at folk er glade i produkta våre, at dei likar det vi lagar. Vi skal brette opp ermane. Og vi skal utvikle oss og investere i ny teknologi. Skal vi vere med i konkurransen så må vi berre gjere det.