– Det er flaks kvart år eg ikkje får mandelen, ler Anders Fannemel.
I jula har han vore saman med familien heime i Hornindal for å lade opp til hoppveka i Oberstdorf som startar på fredag. For familien Fannemel er mandel i grauten like viktig som pinnekjøt på julaftan. Anders gjer alt for å hoppe lengst, men å finne mandelen i grautskåla kan heller resten av familien kjempe om.
– Eg er allergisk, så det er ein jo rulett kvar jul. Eg bør ikkje tygge mandelen.
Merkeleg nok har han heller aldri fått mandelen. Like greitt, meiner Fannemel.
– Premien til den som finn mandelen er ein marsipangris, og det er ein dårleg premie for meg, gliser han.
Kunne ta juleferie med siger i lomma
Årets beste julepresang fekk han nokre dagar før julaftan. 16. desember vann han verdscuprennet i stor bakke i Engelberg. Då hadde det gått nær eitt år sidan førre nordmann vann ein individuell siger i verdscupen, og fleire år sidan Fannemel vann eit renn på det same nivået.
– Det var viktig for laget. Tyskarane har vunne for mykje, så det var godt å slå dei.
Spolar ein tida kort tilbake var sjølvtilliten som skihoppar på botn. 26-åringen fekk det ikkje til å stemme i hoppbakken. Ein måtte langt ned på resultatlistene for å finne namnet til Fannemel.
– Det var godt å få bekrefting på at ting funkar bra no, og at eg framleis kan hevde meg i toppen.
- Les også:
– Ein skal kjenne på at det er tøft
Han var 12 år første gongen han sette utfor ein hoppbakke. Sidan då har det vore fleire tunge stunder i jaget etter lange svev, men Fannemel er kjend for å aldri gi opp.
– Ein skal kjenne på at det er tøft. Det er berre med på å gjere det ekstra spennande, seier han.
Ambisjonane har likevel aldri vore anna enn skyhøge, noko dei også er når Fannemel skal hoppe inn det nye året
– Eg skal kjempe i toppen. No håpar eg at eg får ein god start i kvaliken i Oberstdorf. Ting vert enklare om ein får kontroll frå første hopp.
- Hoppveka kan du følge på NRK frå 29. desember 2017 til 6. januar 2018