Med 2013 i full fart mot 2014, er tida inne for å sjå tilbake på kva engasjerte nett- og mobilbrukarane til NRK Sogn og Fjordane sine nettsider i året som har gått.
- SJÅ OGSÅ: Desse videoane ville «alle» sjå
For medan
, er det dei mange store og dramatiske hendingane som pregar statistikken over kva som engasjerte lesarane i år.1. Tre drepne på Valdresekspressen
I november fekk trippeldrapet om bord på Valdresekspressen ved Holsbru i Årdal stor merksemd. Tragedien, der bussjåfør Arve Kvernhaug og passasjerane Brahim Khouya og Margaret Molland Sanden vart knivdrepne, skaka eit lite samfunn og aktualiserte ei lang rekkje debattar i ettertid. Fokus vart retta mot både asylpolitikk, responstid og beredskap.
- LES ALT OM: Bussdrapa i Årdal
Den sikta i saka, ein asylsøkjar i 30-åra frå Sør-Sudan, har sidan hendinga 4. november sete varetektsfengsla. Han har førebels ikkje latt seg avhøyre.
2. Verdskjend brudgom
Juli var månaden Øivin Vabø frå Vågsøy vart verdskjend og månadens hit på Youtube. Årsaka var utan tvil videoen frå utdrikkingslaget, der kameratane lurer han til å tru at han skal hoppe i strikk frå ei bru.
Etter at NRK.no omtala videoen, gjekk den verda rundt. Saka vart delt nær 7.000 gonger på Twitter og Facebook. Originalvideoen er vist over 4,8 millionar gonger på Youtube.
3. Trafikkulukke kravde tre menneskeliv
Det har vore eit tragisk år på vegane i Sogn og Fjordane, med høgste tal trafikkdrepne sidan 2004. Heller ikkje julehøgtida vart skåna for dødsulukke.
2. juledag vart nabokommunane Førde, Jølster og Gloppen hardt råka då tre menneske mista livet i ein frontkollisjon i Våtedalen i Jølster. Det som skulle vere ei julehøgtid og glede, vart brått snudd til sorg og sakn for mange.
Dei omkomne var eit ektepar i 70-åra frå Gloppen og ein fembarnsfar busett på Jølster.
4. Berga ned skorfaste geiter
Dyrehistorier engasjerer, og geitene som i fleire veker stod fast på ei fjellhylle i Undredal fekk ekstra stor merksemd. Etter fleire mislukka forsøk, sette geitebonden sin lit til elevar ved Sogndal folkehøgskule.
- LES OGSÅ: Slik berga dei «Natalia»
Også dei trengde fleire forsøk, men ei etter ei vart både «Natalia» og «Birka» berga ned på trygg grunn.
5. Sju personar omkom på Ljøsne
Ei 35 år gamal bussulukke vart i september pussa støv av i reportasjen «Ei av tidenes verste ulykker». Sju amerikanske turistar omkom etter at sponplater trefte turbussen dei sat i.
Ulukka fekk stor merksemd då den skjedde. Dagen etter brukte mellom anna VG heile framsida på ulukka i Lærdal.
6. Plagsam liten krabat
Rekna som den verste smitteberaren blant blodsugarane i Nord-Europa, er ikkje skogsflåtten noko å spøke med. Det er kanskje årsaka til at midden kvar einaste sommar får godt med spalteplass i norsk media.
Og i mai var det møtet med Eirik Haukøy frå Kyrkjebø som vart omtala på NRK. Haukøy var ute for å sjå og fotografere hjort. Då han tok kameraet opp frå bakken, var heile kameraet dekka flått.
– Vi såg at dei kravla og aula på kleda våre også. Det var rett og slett fullt av flått overalt. Då fann vi raskt ut at vi måtte vekk derifrå, fortalde Haukøy
7. Tenåringsjente omkom
Ei av dei mange tragiske ulukkene som har skjedd i Sogn og Fjordane i 2013, er rasulukka der Aleksandra Dominika Alberska (15) frå Luster omkom. Tenåringsjenta og ein kamerat var på veg til Sogndal då bilen dei sat i vart treft av ein stein ved Årøytunnelen på fylkesveg 55.
- LES OGSÅ: Minnestund for Aleksandra (15)
Truleg var issmelting og ujamt underlag årsaka til at den sju tonn tunge steinen losna i fjellsida. Føraren kom frå ulukka med lettare skade.
8. Bruk av ulukkesbilete
Hege Øksdal og mannen hennar John Harald Øksdal fronta i november ei viktig og prinsipiell sak. Nemleg media sin bruk av bilete frå alvorlege trafikkulukker.
Paret frå Vik fortalde om deira sjølvopplevde erfaring då bestefar til Hege omkom i ei tragisk traktorulukke. Ulukka hadde dei høyrt om gjennom media, men det var også media som gjennom biletbruk fortalde dei kven som var forulykka.
- LES OGSÅ: Henrik (31) er «blålysjeger»
– Eg unner ingen å oppleve det vi gjorde. Redaktørane må tenkje seg om før dei legg ut bilete frå ulukker så tidleg, seier Hege Øksdal
9. Etterlengta snø?
At folk er opptekne av vêr vart nok ein gang bevist i september. For allereie 1. september plasserte sesongens første snøfall på Vikafjellet seg på topp ti-lista.
– Det er vel ikkje heilt uvanleg i september, men eg tykkjer det er litt tidleg, fortalde Svein Harald Lilleøren frå Vik. Statsmeteorolog Kristin Seter forstod at mange tykte det var tidleg å sjå snøen så tidleg i september, men minna om at det også på sommaren kan komme snø i høgfjellet.
10. B-b-billig hus og gjeld
NRK kunne i oktober fortelje at ein i Høyanger kunne kjøpe seg leilegheiter til null kroner. Og det i ei tid der bustadprisane stadig når nye høgder einskilde stader.
Dei omtala leilegheitene i Hjetlandsbakkane låg ute til forkjøpsrett hjå Boivest. Med på kjøpet følgde også fellesgjeld.
– Der har det over lengre tid vore hjørnesteinsbedrifter som har redusert talet på tilsette. Det har vore ein marknad der som ikkje har vore velfungerande over lengre tid, så for så vidt er dette eit resultat av det som har vore i mange år, fortalde direktør Liv Judit Straume.
Andre topp 30:
- 11. No er det snø i fjella
- 12. To omkomne i bussulukka
- 13. Måtte ta av seg bh-en på flyplassen
- 14. Monstersamfunnet Årdal i motbakke
- 15. Gammalt pengeskap i Eid
- 16. Trailer i full fyr i tunnel
- 17. Sjå kva som var i pengeskapet
- 18. Det er farleg å vere ute no
- 19. Birger Meland omkom i brann
- 20. Prøvde å hjelpe – vart truga med kniv
- 21. Her går 120 tonn sprengstoff i lufta
- 22. Norsk Tipping jaktar nybakt millionær
- 23. Lastebil i fjorden i Balestrand
- 24. Kvinne omkom i trafikkulukke
- 25. Her kunne hjorten enda sine dagar
- 26. Denne steinen kan vere med å endre historia
- 27. May Britt vart kalla hypokonder – no kjempar ho i retten for fleire andre
- 28. Når nokon døyr må Torgeir ut
- 29. Her stod bilen bom fast i skiløypa
- 30. Stel som ramnar frå turisthytte