Stein smadra bil like ved tunnel - jente (15) omkom i ulukka

Politiet stadfestar at ein person er død. Familien er varsla og har frigitt namnet. Den omkomne er Aleksandra Dominika Alberska, 15 år frå Luster.

– Me har aktivert heile kriseteamet vårt, so me er førebudde på å gå vidare so raskt so me finn det riktig.

Det seier Knut Cotta Schønberg, kommunelege i Luster, der jenta er heimehøyrande, og leiar i kriseteamet i kommunen.

Kondolansane er allereie byrja å kome på facebooksida til jenta, og folk har lagt ned blomar på ulukkesstaden.

– No heilt i starten er det legevaktslegen som har vore på ulukkesstaden og vore i kontakt med familien saman med prest, seier kommunelegen.

To personar

Politiet fekk melding om ulukka i 14.30-tida fredag, som skjedde rett ved Årøytunnelen.

Dei første meldingane gjekk på at det var ein person som var alvorleg skadd og ein lettare skadd.

– Det var to personar i bilen. Passasjeren er alvorleg skadd, sjåføren er lettare skadd, sa Per Rimmen, operasjonsleiar i politiet.

Sjåføren, ein mann på 26 år, er lettare skadd.

– Det har vore ei enorm kraft

– Det har kome fleire steinar ned frå fjellsida og bilen er heilt flat. Det er både luftambulanse og utrykkingskøyretøy her. Steinen som trefte bilen er meir enn ein kubikkmeter stor, det er eg ganske sikker på, sa Jon Navarsete, som var augevitne på staden.

– Det har vore ei enorm kraft når den har treft bilen, det syner godt at. Det er lange køar på begge sider.

Blir stengd laurdag

– Geologane vurderer det som so trygt at me kjem til å opna for at bilar kan køyra forbi i kveld, men me kjem til å ha lyttepost på plass og manuell dirigering, seier Nils Magne Slinde, Avdelingsdirektør i Statens vegvesen Sogn og Fjordane.

– Vegen kjem til å bli stengd laurdag frå klokka 10.00 til 16.00 slik at mannskap kan undersøkja fjellsida grundigare. Vegen kjem til å bli opna kvar andre time, also klokka 12 og klokka 14.

Du kan følgja siste nytt om vegstengingar på vegvesenet sine heimesider.