– Vi kan ikkje diktere Førde Arbeiderparti, men vi var ikkje begeistra for denne fråsegna, seier Ap-ordførar i Naustdal, Håkon Myrvang.
Myrvang er oppgitt over at partifellane i nabokommunen nok ein gong viste sin motstand mot fjorddeponiet knytt til gruvedrifta i Engebøfjellet.
– Vi har eit veldig godt samarbeid, så det kom uventa og overraskande. Det var ei veldig skarp fråsegn med omsyn til intensjonsavtalen, og det reagerer vi veldig på, seier Myrvang.
I fråsegna til Førde Ap heiter det mellom anna at «Regjeringa sitt innvilga utsleppsløyve for deponering av gruveavfall i Førdefjorden må vurderast på nytt.».
Fjorddeponi splittar partiet
Gruveplanane til Nordic Mining i Engebøfjellet har vore omstridde, særleg på grunn av planane om å lagre overskotsmassar i fjorden. Førde Ap og Naustdal Ap har hatt ulikt syn på prosjektet, og Førde Ap let ikkje sjansen gå frå seg til å markere dette, på sitt siste møte som eige lokallag.
– Her er det to partilag som gjekk til val med to utgangspunkt knytt til fjorddeponi. Førde Ap var klart i mot at vi skulle ha fjorddeponi, Naustdal Ap gjekk andre vegen, seier Helge Robert Midtbø, tidlegare leiar i Førde Ap.
På tampen av 2017 vart det klart at fjorddeponiet kan bli mindre enn venta.
– Kor lurt var det å gjere dette vedtaket?
– Det er jo litt av politikkens vesen at ein ikkje nødvendigvis er einige om alt. Arbeiderpartiet har ambisjonar om å gjere eit godt val i Sunnfjord. Å bli samde om eit godt partiprogram blir ei viktig oppgåve for det nye partilaget, seier Midtbø, nyvald leiar i Sunnfjord Ap.
– Det blir inga reversering
Myrvang reagerte på fråsegna til Førde Ap med eit lesarinnlegg. Der påpeikar ordføraren at intensjonsavtalen mellom dei fire Sunnfjordkommunane ikkje opnar for endring.
– Dei juridisk bindande avtalane som kvar enkelt kommune har, er bindande også i den nye kommunen. Det blir ikkje noko reversering av saka, seier Myrvang.
Det er venta at gruvedrifta vil gje over 100 arbeidsplassar og vere det skal vere nok malm i Engebøfjellet til at selskapet kan drive lønsam gruvedrift i 29 år.
– Vi er einige om at vi vil ha mineralutvinning og at her er verdiar i massane som vi skal jobbe for å få brukt mest mogleg, og helst alt, påpeikar Midtbø.
Leiaren i Sunnfjord Ap held samstundes fast på sitt standpunkt.
– Mi rolle blir at vi skal prøve å bli einige og lage eit felles program, men mitt syn på fjorddeponi er ikkje endra.