Misser posten og er redd naudetatane ikkje finn fram

– Me har opplevd at posten ikkje har kome fram. Me mistenker også at post kan ha forsvunne, utan at me nokon gong har fått vita om han, seier Ove Myrmel, leiar i Nasdalen grendalag.

Til dømes fann ikkje eit brev frå Statens vegvesen vegen dei 17 kilometrane sørover frå Førde til Myrmel nyleg. Det måtte hentast på trafikkstasjonen.

– I tidlegare tider kom postboda fram både til fots og til hest. At me no oftare og oftare opplever problem, er eit tilbakesteg, seier Myrmel.

– Det har så vidt eg veit ikkje vore problem med at politi eller ambulanse ikkje har funne fram. Men det er ikkje noko ein skal venta på at hender. Det skal ein førebyggja at ikkje skjer, seier Myrmel.

Halve bygda har fått

Delar av innbyggjarane i grenda har fått nye vegadresser, men det gjeld ikkje dei som har direkte tilkome frå E39. Dei bur berre på ei såkalla matrikkeladresse, som er bygd opp av eit gards- og bruksnummer, og eventuelle feste- og undernummer.

Problemet for innbyggjarane på Myrmel er at europavegen ikkje har fått eit vanleg gatenamn.

Sjølv om kartverkssjefen meldte at alle i Noreg landet skulle få adresser innan 2015 og det står i matrikkelforskrifta at alle skal ha adresser, har det altså ikkje gått i orden.

Er nøgd med kommunane

Fylkeskartsjef i Vestland, Anne Lien, er klar på kvifor det er viktig med ei skikkeleg vegadresse.

– Tidlegare skjedde alt lokalt. Posten blei sortert på det lokale postkontoret og ambulansesjåføren jobba i sitt lokalsamfunn. Alle visste kvar alle budde. No er alt mykje meir sentralisert, og ein er nøydd til å ha ei eintydig vegadresse for at desse tenestene skal nå fram i tide, seier ho.

– I ein travel kvardag skjønnar me at det ikkje er lett å prioritera adresseringsprosjekta blant andre oppgåver. Me er veldig nøgde med den innsatsen kommunane har gjort, seier Lien.

Mellom anna skryt Lien av Fjaler kommune. I 2013 var kommunen heilt utan vegadresser, medan dei no har ei dekning på 98 %.

– Me har erfart at det gjerne må ein ressursperson i kommunen til for å få prioritert eit adresseprosjekt. Om ein også vel gatenamn det ikkje blir så mykje diskusjon rundt, er det mogeleg å få på plass adresser så raskt som dei har klart i Fjaler, seier fylkeskartsjefen.

Stoppa opp grunna samanslåing

– I fjor hadde Gaular kommune eit forslag til namn på E39 mellom Førde og Vadheim, men det var sett på vent til kommunesamanslåinga var gjennomført, slik at ein berre trong å gjennomføra ein prosess i ein kommune, seier oppmålingsingeniør i Sunnfjord kommune, Knut Ove Indrebø.

Kommunen jobbar for augneblinken med adressering.

– Det er to lange trasear i kommunen som ikkje har fått vegadresser, nemleg fv. 13 mot Sogndal kommune og E39 mot Høyanger kommune, seier Indrebø.

– Elles er det oppretta saker på dei andre vegane i kommunen som ikkje har vegnamn.