Midtbanespelaren var kampens gigant, men møtte ikkje pressa etter 1-0-sigeren.
Seks minuttar før slutt fekk han direkte raudt kort etter ei takling der han først trefte ein Aalesund spelar med olbogen og takla ein annan med knottane først.
– Eg trudde det var tull då det vart raudt, og trudde det var ein fair kamp om ballen. Så ser eg i ettertid at han er oppe med knottane litt, men for meg er det gult kort, seier trenar Eirik Bakke.
– Kampen hadde alt
Bakke og dei vel 5.000 publikumarane fekk sjå kampens einaste mål etter berre to minuttar. Nemnde «Chidi» fekk sjansen på frispark frå 20 meter. Ballen lempa han i vinkelen.
Sogndal skal kommande veke i dialog med den engelske klubben om å få halde på midtbanespelaren.
Bakke konstaterer at kampen mot Aalesund hadde alt.
– Ei fantastisk scoring, spenning heile kampen, god stemning og så toppa det seg sjølvsagt på slutten med eit raudt kort. Men vi drog sigeren i land, konstaterer ein letta Bakke.
– Skal vere slik
Sogndal tok sin første eliteseriesiger på heimebane mot gjestene. Det var også første gang sidan 1996 at Aalesund reiste poenglause frå Sogndal.
«Chidi» gav Sogndal draumestarten, men også marerittavslutninga. Med ti mann fekk Sogndal ein forsvarsjobb på slutten.
Bakke klandrar ikkje matchvinnaren, som er på lån frå Manchester City.
– Skal han konkurrere mot dei beste, så må han vise den mentaliteten. Om ikkje, så kan han berre halde fram å spele i Tippeligaen, seier Bakke og held fram:
– Han skal vere på grensa, ha den vinnarviljen, ofringa for laget og taklingane. Eg har sjølv vore der, så får ein heller tole eit raudt kort, smiler Bakke.
Amper avslutning
Ulrik Fredriksen vedgår at det vart ampert på slutten, med fleire situasjonar der det vart både knuffing og skubbing mellom spelarane.
– Det var bra trykk på bana og tribunen, men det er berre kjekt det, gliser forsvararen som også såg makker Kjetil Wæhler bli eldste utespelar i eliteserien nokosinne.
– Trioen til Sogndal forsvarer på ein fantastisk måte. For ein unggut som vil bli god i fotball, så er det lov å sjå på korleis Sogndal gjer det i dag. Dei gjer det vanskeleg for oss og er ekle å møte, seier AaFK-trenar Trond Fredriksen.
Tamde angrepsvåpena
Bakke sitt mannskap klarte å temje Aalesund sine viktigaste angrepsvåpen.
Forsvarsrekkja stogga målfarlege Mustafa Abdellaoue og Lars Veldwijk, medan Lars Christian Kjemhus tamde kreative Edwin Gyasi.
– Eg sa før kampen at den ville bli avgjort i boksane, og der var vi store i dag. Det er god vinnarmentalitet i gruppa, avsluttar Bakke.