– Vi hadde heile tida eit håp om at fornufta skulle vinne

– Eg er veldig glad og letta. No synest eg vi skal få lov til å gjere det vi skal gjere, nemleg å sjå framover og jobbe vidare, seier styreleiar i kommunalt føretak, Innvandrarsenteret i Florø, Ronny Cassels.

Han seier det er mage som fortener takk etter at regjeringa skar igjennom og snudde om på UDI sitt vedtak om å legge ned asylmottaket i Florø.

– Eg vil takke alle som har bidrege til at dette har vore mogleg å få til.

– kven er det?

– Eg kan ikkje kome på nokon som ikkje har vore viktig. Vi har jobba godt i lag tverrpolitisk i kommunen. Ordførar, rådmann og heile det politiske miljøet i kommunen har vore med, seier Cassels.

• LES OGSÅ: Vedum stenger regjeringsdøra for Rødt og MDG

Kan bli fleire nedleggingar i region Vest

– Når vedtaket er gjort ser vi fram til vidare samarbeid med Flora kommune og Solbakken asylmottak, seier regiondirektør i UDI region Vest, Stig Arne Thune.

– Tenker de no langsiktig i Florø?

– Det er jo vanskeleg i denne bransjen. Det er utruleg få asylsøkarar som kjem til landet no samanlikna med i 2015. Nedgangen var på heile 27 000 personar frå 2015 til 2016. Og om dette held fram, ser eg ikkje bort frå at det kan bli fleire nedleggingar i region Vest, seier Thune.

Lite imponert over UDI

– Eg er ikkje imponert over UDI. Dei tok aldri kontakt med oss før vi fekk vite at dei hadde bestemt seg for å legge ned mottaket, seier styreleiar Ronny Cassels.

Han har følgjande råd til UDI når dei skal vurdere framtidige nedleggingar:

– Eg vil be UDI innstendig om å sette litt ressursar inn i å ha dialog med dei kommunane og operatørane det gjeld når dei vurderer nedleggingar. Det kan vere ting ute i kommunane som UDI ikkje er klar over når dei sit og jobbar på kontoret sitt.

• LES OGSÅ: Listhaug vil setje menneskerettane til side

Meiner vedtaket om nedlegging var velfundert

Regiondirektør i UDI region Vest, Stig Arne Thune seier det no berre finst gode mottak i fylket og at det no reverserte nedleggingsvedtaket deira var velfundert.

– Vi har generelt for mange ledige asylplassar i mottak rundt om kring. Vurderinga om å legge ned i Florø var gjort ut frå ei heilskapsvurdering av både beredskap, pris, kvalitet i forhold til andre driftsoperatørar, seier Thune.

Styreleiar i Innvandrarsenteret i Florø, Ronny Cassels seier han måtte felle nokre tårer då beskjeden om at mottaket får bestå kom.

– Det såg veldig stygt ut. Vi er vane med at store, tunge, byråkratiske institusjonar er vanskeleg å snu. Ei lita stund hadde vi ikkje mykje tru på at dette skulle vere mogleg å reversere. Men vi hadde heile tida eit håp om at fornufta skulle sigre.

• LES OGSÅ: Facebook-kampanje om strengere asylforskrifter har nådd millioner
• LES OGSÅ: Ap-Hadia: – Private helseaktører kan ikke tjene fritt på omsorg