Vudjet 80.000 km jahkái vai mánát besset oahppat sámegiela doppe gos orrot

Buoret jođi go oru, daddjo sámegiel sátnevádjasis. Dát orru leamen Mirja Päiviö ja Romssa suohkana oktiibuot 12 johtti oahpaheaddji láidesteaddji eallinsátni.

Mirja gal lohká ráhkistit iežas barggu.

– Oh. Dasa gal liikon hirbmat bures. Dan lean lohkan maiddái mu hálddahussii ja mu bargoustibiidda, kollegaide. Mun gal nu liikon mannat daidda skuvllaide. Mus leat vihtta skuvlla ja gávcci iešguđet joavkku, čilge Päiviö.

Ođđa oahppiidoláhus

Odne son lea jođus Sálljnjárgga skuvlii Sállirii, gosa lea sullii ovcci kilomehtera. Dán skuvllas Mirjas leat guokte oahppi.

– Dat lea nu somá boahtit daidda ohppiid lusa ja oahpahit dan sámegiela ja kultuvrra. Don oainnát, ahte sin modji stuorru go sin oahpposeahkka dievvá.

Sámegiela fágajođiheaddji čájeha mielas kárttas gos gávdná dan 33 skuvlla Romssas, gos buohkanassii 271 oahppi ohppet sámegiela.

Dušše čavčča rájes lea ohppiidlohku lassánan 30:iin.

– Mu mielas doaibmá hirbmat bures. Mánáide lea oadjebas dilli, eai dárbbaš vuolgit eret iežaset ruovttuskuvllas ja besset leahket doppe gos leat čađat, dadjá fágajođiheaddji Marit Berit Eira.

Guktii birra eananjorbadasa

Mirja Päiviö vuodjá biillain sullii bealgoalmmát duhát kilomehtera jahkái. Dát lea seammá guhkás go Davvenjárggas gitta Lindesnesii.

Johtti oahpaheaddjit vudjet oktiibuot sullii 80.000 kilomehtera jahkái. Dát lea beali eambbogo eananjorbadasa birra Ekváhtora bokte.

– Dál vuodjit iežamet biillain. Livččii vuogas jus mis livččii Romssa suohkana biila, seammá go ruovttubuohccedivššášiin lea, sávvá Päiviö.

Gávccejahkásaš Siren lea nubbi guovtti oappás geat Sálljnjárgga skuvllas ohppet sámegiela. Son liiko sámegillii.

– Buorre.

Mii lea buorre sámegielas?

– Ahte mun oahpan sámegiela.

Siril lea 12 jagi boaris. Son maid lohká iežas liikot sámegieldiimmuide.

– Mun beasan eambbo sámegiela oahppat, mot mun čálán for eksempel dahje human.

Mirja rámida Romssa suohkana go nu máŋga jagi leat doalahan johtti oahpaheaddji fálaldaga.

– Hirbmat buorre. Dat oidne dan dárbbu. Dat oidne dan dehálašvuođa. Dat oidne ahte sámegiella ja kultuvra ii leat heajubut go dat majoritehtagiella. Dat leat dásseárvvus, seammá árvvus. Dat lea buorre, rámida Mirja Päiviö Romssa suohkana.