NRK Meny
Normal

Somá go ain lágidit heargevuodjimiid

Muhto unohas go ii leat šat dat čáppá govva sámi gilvovuodjimis mii lávii.

Beassášlávvordaga heargevuoddjimat leat rievdan lohká Junnan.

Johan Mathis «Junnan» Eira beassášlávvordaga heargevuoddjingilvvuin Guovdageainnus.

– Dat lea somá go heargevuodjingilvvut leat bistán nu guhká, muhto dat leat gal rievdan, dadjá Johan Mathis «Junnan» Eira.

Rievdan

Beassášlávvordaga beaivet Sámi faláštallanšiljus máilmme heargevuodjingilvvuin Guovdageainnus čuččoda Reinlykken-beakkálmas gávttiin ja šávkkáin.

Son lea čuvvon heargevuodjingilvvuid álgo jagiid rájes, 1947 jagi rájes, ja govahallá ivnniiguin movt heargevuodjinšillju lávii leat.

– Dalle lávii leat heargevuoddjin šillju visot ruoksadin. Lávejedje maid leat gabbabeaskahasat, gávttehasat ja olbmot čiŋadedje eanet heargevuodjingilvvuide. Dál lea eanaš olbmuin reažžu. Ii leat buorre oaidnit gii lea sápmelaš ja gii ii leat. Ja dat gal lea mu mielas unohas, go de ii šatta dat čáppa govva sámi gilvovuodjimis, lohká Junnan.

Mátkkoštan guhkas

McDougall-bearaš lei boahtán gitta Skottlánddas Guovdageidnui geahččat heargevuodjimiid ja sin mielas lei dát hui somá.

– Mun ráhkistan geahččat dán gilvvu. Lei hui somá oaidnit ovtta vuojána mii ii lean mielas mannat álggahangássa sisa. Muhto go de bohte johtui, de sis lei nu leahtu. Hui somá geahččat, dadjá Jackie.