Ruošša journalista dubmejuvvon giddagassii

Ruošša journalista Aleksandr Nevzorov lea dubmejuvvon čohkkát giddagasa gávcci jagi, go galgá ráhkadan «boasttu ođđasiid ruošša soahteveaga birra», nu dieđiha ruošša ođasdoaimmahat Tass.

Nevzorov lea garrasit cuiggodan soađi Ukrainas. Son guđđii Ruošša njuolga maŋŋel go soahti álggii, ja son ii leat riektelanjas dikki vuolde. Ruošša eiseválddit álge dutkat Nevzorov diibmá giđđat.

Dalle lei son bidjan dieđuid sosiála mediaide ahte ruošša soahteveahka dihtomielalaččat ledje bomben buohcciviesu gos ledje eatnit ja easkariegádan mánát, Ukraina gávpogis Mariupolas, nu čállá Reuters. Ruošša eiseválddit leat biehttalan dán čuoččuhusa.

Eanemus gehččon filbma Netflixas

Kampen om Narvik filbma lea dat filbma maid leat dán vahkkus eanemusat geahččan olles máilmmis, nu čájehit Netflix vahkkosaš logut. Dan čállá avisa Fremover.

Ođđajagimánus lei vejolaš geahččat filmma streamema bokte 84 riikkas, ja dan rájes leat filmma streamen measta 38 miljovnna minuhta. Dat lea 20 miljovnna geardde eambbo go dat filbma mii lea nuppi sajis.

Dat mielddisbuktá ahte badjel 21 miljovnna olbmo leat geahččan filmma ovtta vahkkus. Filbma boahtá norgga streamenbálválusaide čakčat.

Oaivvilda goddinearri lea beare badjin

Otne álgá albbasbivdu, ja Birasdirektoráhtta diktá báhčit 51 ealli. Albbas lea áitojuvvon Norggas, ja Luonddugáhttenlihttu oaivvilda goddinearri lea beare allat. Luonddugáhttenlihttu luondduvalljivuođa fágajođiheaddji, Arnodd Håpnes, čállá preassadieđáhusas ahte albbas lea dál mealgat vuollel nállemihttu.