Girjjážiid, main leat sámi sátnevádjasat, ostet olgoriikka turisttat mátkemuitun go fitnet Sámis. Dan muitala ČálliidLágádusa beaivválaš jođiheaddji John Trygve Solbakk iežaset fuomášan.
Jorgalahttán girjjiid
– Mii leat ráhkadahttán ČálliidLágádusas sátnevájas girjjiid, álggos sámegillii, dárogillii ja de eŋgelasgillii ja duiskagillii. Dat mii muitala ahte fertejit leat turisttat geat ostet dáid girjjiid, lea namalassii dat ahte eanemusat daid diŋgojit dat museat mat leat dáppe davvin, dadjá Solbakk.
Son muitala ahte earret eará Girkonjárgga Grenselandsmuseum ja Álttá musea leat stuorra diŋgojeaddjit. Museat diŋgojitge vierisgielaide jorgaluvvon sátnevájasgirjjiid ja dan oaivvilda Solbakk mearkkašit dan ahte leat turisttat geat ostet daid.
– Mun doaivvun ahte sátnevájas girjjit leat erenoamážit dan dihtii nu bivnnuhat go dain lea uhccán teaksta, iige dárbbaš nu olu lohkat ovdal go fuobmát gos leat dat sátnevádjasat vuolgán ja kulturerohusat leat álkit čilgejuvvon sátnevádjasiid bokte.
«Jođi lea buoret go oru» sátnevájasgirji
Foto: Anne Olli/NRKJorgalit eambbo gielaide
Girji mii johtá bures lea ČálliidLágádusa «Jođi lea buoret go oru», man Harald Gaski ja Aage Solbakk leaba čohkken ja doaimmahan. Solbakk čilge ahte dát girji fuomášuhttá olbmuid eará kultuvrrain mo min kultuvra earrána eará kultuvrrain ja dan dihtii lea dat maiddái várra nu bivnnut. Dan dihtii jorgalit dan dál eambbo gielaide.
– Borgemánus ilbmá girji maiddái japánagillii, čakčat espánnjagillii ja de ferte maiddái fránskagillii, dadjá Solbakk.
