Sámediggeráđđi Silje Karine Muotka oaivvildda Norgga eiseválddiid dušše dahkaluddan go leat čoahkkinastán ášši birra Sámedikkiin.
Foto: Åse Pulk/NRKNorgga ja Suoma eiseválddit dat leat árvalan ođđa bivdonjuolggadusaid Deanočázádahkii.
Árvalus lea leamaš gulaskuddamis, ja dál lea maiddái sámediggeráđđi gieđahallan dan. Ráđđi hilgu evttohusa, ja ávžžuha maid Sámedikki dievasčoahkkima dahkat dan seamma.
Sámediggeráđi oaidnu lea ahte guoskevaš vuoigatvuođalaččat galget oažžut vejolašvuođa hábmet evttohusa mas sin mielváikkuheapmi hálddašeapmái ja muddemiidda fuolahuvvo buorebut.
– Buohkat leat ovttamielalaččat das ahte bivddu ferte geahpedit gaskaboddasaččat nannen dihtii bivddu vuođu buorebut boahtteáigái, muhto dat ferte dahkkojuvvot govttolaččat sihkkarastin dihtii árbevirolaš bivddu, čilge sámediggeráđđi Silje Karine Muotka.
Sin mielas lea maid deaŧalaš ahte báikkálaš olbmot, geat ásset lahka resurssa, galget vuoruhuvvot nu bures go vejolaš bivddu geahpedeami oktavuođas.
– Eiseválddit dušše dahkaluddet
Sámediggi lea čađahan konsultašuvnnaid departemeanttain dán áššis. Muhto das lei unnán ávki, go Muotka mielas departemeanta lea juo ovddalgihtii mearridan doarjut šiehtadusa dálá hámis.
Su mielas eiseválddit leat dušše dahkaluddan go leat konsulteren ášši birra Sámedikkiin.
– Mii evttoheimmet konstruktiivva árvalusaid ahte mo sihkkarastit báikkálaš doarjaga ja dárbbašlaš lobálašvuođa šiehtadussii. Dađibahábut stáhtačálli Lunde ii beroštan oppanassiige árvvoštallat Sámedikki evttohusa, muitala Muotka.
Áigu čoahkkinastit vuoigatvođalaččaiguin
Dál ávžžuha Sámedikki dievačoahkkima hilgut árvalusa.
– Das livččii nana deaddu Stuorradikki meannudeami hárrái, Muotka oaivvilda.
Sámediggeráđđi áigu maid čoahkkinastit Suoma Sámedikkiin ja Norgga ja Suoma beale vuoigatvuođalaččaiguin dán áššis, muitala Silje Karine Muotka.
