Sáme dávverijt Dujskan åtsådi
Julevsáme guovdásj Árran la maŋen stuorra åtsådimprosjevtan mij galggá vuosedit makkir sáme dávvera dujska musiejajn gávnnuji. Prosjevta namma l Dávvirat Duiskkas (Dávvera Dujskan).
Prosjevtan galggi aj tjoaggemhiståvråv ja máhtov juohkka ájnegis dávvera birra tjadnat aktij, ja låpptit máhtudagáv sihke dujska kultuvrraárbbeásadusájn ja sáme musiejajn.
– Duot dát dávvertjoagge l læhkám dáppe nuorttan sáme dávverijt tjoaggemin ja de Dujsskaj doalvvum. Sierraláhkáj birrusij jage 1900 lij viek stuorra berustibme tjoagget duov dáv dávverav moattet sajes, subtsas dutkamjådediddje Oddmund Andersen NuorttaSálto avijssaj.
Nágin dujska musieja juo diehti dá li gávne ma dávk li ájnnasa sáme musiejajda ruopptot oadtjot, tjielggi Andersen.
– Jáhkáv sihti dávverijt máhtsadit. Dagu Norsk Folkemuseum, sijá siegen li dahkam Bååstede maj baktu de lip oadtjum dávverijt sijddaj vas. Valla ihkap sihti nágin dávverijt vil adnet, de sjaddap sjiehtadallat dán birra.
Dán prosjæktaj ij gullu gávnijt ruopptot oadtjot vas. Dåssju åtsådit ma gávnnuji.
– Valla mij gudi lip prosjevtan fáron vuojnnep luondulasj la nágin gávne galggi ruopptot Sábmáj, sjattasj dávk geldulasj prosjækta, javllá Andersen.