– Dát la budsjæhttaoajvvadus majna mij buoragit viessop, javllá sámedikke presidænnta Egil Olli NRK Sábmáj.
Olli la sierraláhkáj dudálasj mij gullu sámegiellaj ja kultuvrraj. Dájda juollodimijda mij duodaj lijkkup.
– Mij ij lim nav buorre ja masi lijma vuorddám ienep rudájt la oahpponævvo buvtadibmáj. Dan suorgen fájlluji rudá, dættot Olli.
- Valla ålleslattjat lip mij dudálattja budsjæhttaoajvvadusájn. Ja duodden aj oadtju Finnmárkokomisjåvnnå 17 milliåvnå kråvnå mij ij gullu Sámediggáj.
Ij dádjada manen presidænnta sjållåha
Vuona sámij rijkkasiebre (NSR) parlamentáralasj jådediddje Aili Keskitalo ij dádjada majdik presidenta sjållåhimes mij gullu 2013 budsjæhttaoajvvadussaj.
Aili Keskitalo ij la dudálasj 2013 budsjæhttaoajvvadusájn.
Aili Keskitalo ij la dudálasj 2013 budsjæhttaoajvvadusájn.
Foto: NSR– Olli la iehtja gájbbedam ráddidusás viehka ienep rudájt Sámediggáj gå dav mij dánna oajvvaduvvá, gåktu de sådnå máhttá liehket dudálasj, gatját Keskitalo.
Gå dal presidænnta návti nammat sån la dudálasj dájna oajvvadusájn, de ham de sån rádjá signálajt oajválattjada jut dát la nuoges ja de ham Stuorradigge ij des dárbaha usjudallat Sámedikkev, jáhkká sån.
Sámedigge l iehtja mierredam gájbbedit lassedoarjjagav 139 milliåvnå kråvnåj, valla dán oajvvadusán boahtá 32 lasse milliåvnå.
– Ep de máhte dudálattja liehket budsjæhttalassánimijn mij la 100 milliåvnå kråvnå vuolep gå dav majt lijma sávvam, dættot Keskitalo.
Rahterudá Nordlánndaj
Nordlánndaj båhti lasse rudá ådå rahteprosjevtajda, aktij 1,1 milliárdda kråvnå.
Hålogálátteråvvåj mij la tsieggiduvátjit båhti 690 millijåvnå kråvnå.
Ja E-6 ådåstuhttemij Skilggáváren, Hábmerin båhti 40 millijåvnå kråvnå ådåstuhtátjit vihtta kilomehterav, valla aktij galggá 17,5 kilomehtar E-6 rahtes danna ådåstuhteduvvat.
Rahteådåstuhttem Skilggáváren álggá boahtte jage ja vihpá gålmmå jage.
– Dát merkaj ållu ietjá boahtteájgev sidjij gudi galggi maneldit oarjás nuortas ja nuortas oarjás dán rahte milta, javllá stáhtatjálle Jåhtulakdepartementan, Janne Sjelmo Nordås.
- Lågå:
- Lågå aj:
