Ovddeš eamiálbmotjođiheaddji ii duostta šat ruoktot - ohcá dorvobáikki USA:s

Ruošša eamiálbmotovddasteaddjiid dilli hedjona oktilassii, go eiseváldit sivahallet sin láhkarihkkun ja riikabehtolažžan.

Nu leage fas stuorámus eamiálbmotorganisašuvnna ovddeš jođiheaddji šaddan gárgidit olgoriikii.

Dál ii dáhto Pavel Suliandzyga ruovttoluotta ja lea ohcan dorvvu Ámerihkás go oaguhuvvo ruovtturiikkas.

• Les denne artikkelen på norsk

Fertii čiehkádit

Son lea máilmmi metropolii New Yorkii boahtán eamiálbmogiid bealuštit, muhto ruoktot ii duostta máhccat.

Bákkus fertii čiehkádit ja guođđit siiddas nuorttamus Sibiriijás, gos udege-álbmogaš eallá davviguovlluid viidámus vuvddiin.

Ruošša eiseválddit oaguhit su, ja son áitojuvvo gitta váldojuvvot go báikegottis viggá gáhttet industriija sisabahkkejeddjiid ja oligárkkaid ruhtaválddi vuostá.

– Muhtin hearrá bođii stuorra gávpogis ja buvttii báhpára. Son celkkii ahte son dat oamasta dán eatnama, su opmodat dat dál lea vuovdi ja čáhci. Ii son gohčo báikki olbmuid čáhpodit eret, muhto buot visot maid sii buvttadit doppe, gullá sutnje.

Su báikegottis bealušteami ja Raipon eamiálbmotorganisašuvnna politihkalaš barggu dihtii leat Ruošša sihkarvuođa poliissat hutkan sivahallamiid, ahte son mat áiggošii ásahit sierra stáhta, riikka militeara vuoldit ja ahte suoláda ruđaid báikegottistis.

– Dat ledje sihkarvuođa poliissat geat bággejedje su guovllu olbmuid čállit vuollái báhpára, vearálaš sivahallancealkámuša Pavela vuostá.

– Ii dušše su vuostá

Poliissat ráhkadit vearri duođaštusaid ja sivahallamiid politihkalaš dissideanttaid vuostá, ja dát lea šaddan dábálaš oaguhanvuohkin.

– Na, ja vahágis ii dušše su vuostá. Orru leamen dán áigái nu, ahte ráhkadit vearri áššiid olmmošvuoigatvuođaid bealušteddjiid vuostá, ja dat lea eiseválddiin dábálaš meannu.

Son lea gálguinis ja vuolleahkásaš mánáidisguin ohcan dorvobáikki USA:s, muhto ruoktu lea ruoktu.

– Ruošša lea mu ruovttueana, doppe lea mu álbmot, mu bearaš ja sohka.