22-jahkásaš Guovdageaidnulaš Anne Berit Pulk gal lea jienastan ovddalgihtii juo odne. Son lea dáid beivviid jođus Romsii gazzat oahpu.
– Mun in jáhke mun astan boahtit ruoktot válgabeaivve. Danin jienastan ovddalgihtii.
Anne Berit Pulk lea ráhkkanan, ja lea dihtomielalaččat čuvvon válgagičču juo álggu rájes.
Foto: Torgeir Varsi / NRK– Soapmásiidda soaitá leat váttis dál juo diehtit maid jienastit go válgagižžu ii leat albma ládje vel boahtán johtui, lohká Pulk.
Fertejit jienastit ovddalgihtii
Válgabeaivvi, mii lea čakčamánu 11. beaivve, sáhttá duššefal iežas gielddas jienastit. Ja sii geat orrot gielddain gos leat unnit go 30 jienasteaddji sámediggeválggaide, fertejit jienastit ovddalgihtii.
Lea deháláš ahte olbmot ožžot dieđu dán birra, lohká sámedikki dievasčoahkkima jođihangotti jođiheaddji, Jørn Are Gaski.
Jørn Are Gaski lea máŋgii válggaid oktavuođas vásihan ahte olbmot leat behtohallan go leat jáhkkán sii sáhttet jienastit válgabeaivvi.
Foto: Dan Robert Larsen / NRK– Juohke válggaid leat olbmot riŋgen válgabeaivvi ja imaštan go eai beasa jienastit. Dát leat dávjá leamaš olbmot geat orrot gielddain gos leat unnit go 30 sámediggejienasteaddji.
– Stuorra várra jus eai dieđe
Dán jagi leat ollu olbmot geat orrot lulli Norggas dieđihan iežaset Sámedikki jienastuslohkui. Stuorra oassi sis eai beasa jienastit válgabeaivvi. Diehtojuohkin dán áššis lea dehálaš.
- Siihan leat vuosttašháve jienasteaddjit. Lea stuorra várra jus eai dieđe ahte eai beasa jienastit válgabeaivvi. Dát čuohcá sámedikki legitimitehtii, jus válgaoasálastin lea vuollegaš dáin guovlluin, čilge Gaski.
Leat sávaldagat
Gaski sávvá boahttevaš válggaide elektrovnnalaš terminála mii addá buohkaide vejolašvuođa jienastit sámedikki válgabeaivvi, beroškeahttá gos orrot.
Mannan válggaide jienastedje 43 proseantta sámediggejienasteddjiin ovddalgihtii.
– Mun sávan ahte sii geat fertejit jienastit ovddalgihtii besset diehtit dan, ja ahte sii geavahit jienastanvuoigatvuođaset, loahpaha Gaski.
