Guovdilastinsuorggit NBR gáibádusas leat guohtuneatnamiid suodjaleapmi, nannet boazodoalu iešstivren ja iešmearridanvuoigatvuođaid, sihkkarastit boazodoalu bearašvuođuštuvvon ealáhussan, sihkkarastit boazodoalu ceavzilvuođa boraspirevahágiid hárrái ja sihkkarastit čálgoortnegiid ja DBS-ortnega boazodoalus.
Vuđolaččat čilgehuvvon
Norgga Boazosápmelaččaid Riikkasearvvi jođiheaddji, Ellinor Marita Jåma, mieđiha ahte NBR gáibádus lea viiddis, seammás go sin gáibádus lea bures ja vuđolaččat čilgejuvvon.
– Raporttaid Boazoealáhusa Árgabeaivi ja iešstivrema Hástalusat birra de mii leat čohkken buriid duođaštusaid min gáibádusaide, mii maiddái dagaha ahte fas gáibidit álggahit ovdalis heaittihuvvon ortnegiid. Dat sáhttet ovdamearkka dihte leat ortnegat mat gulle guođohanbarttaide, dadjá NBR jođiheaddji, Ellinor Marita Jåma.
Bealli oahpahallin leat nieiddat
NBR deattuha maiddái dárbbu joatkit oahpahalliortnega boazodoalus. Jagi 2001 rájes gitta 2016 rádjái leat leamašan oktiibuot 147 boazodoallooahpahallit, geain 98% lea váldán fágageahččaleami. Dál leat 21 oahpahalli soahpamuša mat eai leat loahpahuvvon main váile 50% oahpahallin leat nieiddat.
– Mu mielas lea oahpahalliortnet dehálaš go dan bakte mii ráhkkanahttit nuoraid boazodoalloeallimii ja bargui, seammás go mii maiddái rekrutteret eanet nieiddaid boazodollui, loahpaha Jåma.
