Musihkka ájnas gå galgaj gielav oahppat
Musihkka sjattaj ájnas Kajsa Baltoj gå galgaj sámegielav vas oahppat. Suv mielas máhttá sámegiela lávllom musihkkatijmajn skåvlån oadtjot ienebujt gielav oahppat.
– Sámegiela lávllomtevsta l álkke oahppat. Árvvedav la buorre vuohke gåktu jienajt ja javllamusájt hárjjidallat, javllá Balto.
Alstad nuorajskåvlån Bådåddjon åhpadi ienemusát ieŋŋilsgiela ja dárogiela lávllomtevstajt musihkkaåhpadusán. Valla oahppe jáhkki musihkka luluj buorre viehkken sámegielav åhpatjit.
– Jáhkáv la álkkep ienni gå agev oahppat tjállema ja låhkåma baktu, javllá Erik Cornelius Aira Amundsen.
– Dát lij galla læhkám kult, javllá sån dan birra jut lij læhkám buorre sámegielav oahppan musihka baktu.
Dássta oadtju dårjav åtsådiddjes. Nora Bilalovic Kulset la musihkkaåtsådiddje NTNU:an. Suv mielas lávla máhtá liehket ávkken gå la oahppamin ådå gielav.
– Gielav njága vuojŋŋama sisi. Danen gå hárjjidalá váni diedek. Ja de li moadda buorre ávkke lávllagijn gå gielav galga oahppat, subtsas Kulset.
– Musihkka l munji læhkám vuohke ietjam gielav nannitjit, subtsas Balto.