ESC - Eamiálbmogiid boahttevaš lávdi?

Mátkereive Lisboas

Mun lean Lisboas. Dáppe leat dál artisttat, berošteaddjit ja vaikko man ollu journalisttat čoahkkanan. Eurovision Song Contest lea dat mii čohkke.

Maiddái mun sámi journalistan lean dán háve dáppe čuovvume máilmmi stuorámus musihkkagilvvu. Ja sivvan go deike lean vuolgán lea go dát lea šaddagoahtán lávdin masa maiddái eamiálbmotartisttat besset. Vaikko vel gullet ge unnitálbmogii, de eai ovddas gal iežaset álbmoga, muhto baicca ruovtturiikkaset. Eai fal nu dávjá gal, muhto sii leat goit leamaš doppe. Mathis Hætta, Simona Máhtte, lei dat vuosttaš gii dan dagai. Áidna artista dássážii gii gávttiin bođii dán lávdái, ja juoiggai dan lávlagis man ollugat muitet vel dál ge.

Unnitálbmogat oidnosii

Dál de lea fas eamiálbmot ovddasteaddji beassan lávdái, muhto son boahtá nuppe bealde máilmmi - guhkkin eret Eurohpa. Su namma lea Jessica Mauboy.

Ii leat álki oažžut Jessica ságaide, go son lea nu bivnnut ahte eai luoitte journalisttaid su lahka. Dát sámi sáhkkes journalista livččii háliidan diehtit maid son ieš jurddaša dál, ahte son aborigiinna artistan sáhttá leat ovdagovvan nu máŋgasii. Muhto gažaldat lea ain jearatkeahttá. Dat dušše jorrá mu oaivvis, ja nu go mun oainnán, de šattašii dát vuoitun maiddái sápmelaččaide jus Jessica vuoittášii. Ahte son gállá bálgáid maid eará unnitálbmogiid artisttat soitet dustet čuovvut.

Luođi gal dovdet

Preassaguovddážis leat journalisttat gealdagasas, ja gehččet maid bookingfitnodagat einnostit. Muhto oddsat leat dego dálki - dat rievddadit. Mun humadan goit iežan bargoustibiiguin, ja muitalan gosa gulan.

Vaikko ollu journalistat dovdet ESC-gilvvuid historjjá, de eai leat gallis geat dihtet mii sápmelaš lea. Go mun de juoiggastan veaháš Sámiid eadnan-šuoŋa, de gal nivkkuhit ja dadjet ahte diet šuokŋa gal lea oahpis. De báhcá ge munnje jurdda ahte sáhttá addit doaivaga ahte eamiálbmotmusihkka nai beassá eanet gerddiid gullot Eurovisionis, ja darvánit olbmuid bealljái ja muitui. Go giella ii oro dahkame maide. Muhtun riikkaid lávlagat leat ruovtturiikka gillii, eai ge eŋgelasgillii man eatnasat ipmirdit. Sámegiella soaittášii šaddat vaikko man bivnnuhin dán lávddis.

Ii leat guhká vel ovdal go mii diehtit dán jagáš bohtosa, maŋŋel go Jessica ja dat eará artistat leat lávlon ja jienasteapmi lea loahpahuvvon. De mii diehtit lei go eamiálbmotjietna mii vuittii vai ii, ja beassat geahččat lei go dás ávki su álbmogii. Muhto mii jienastit váimmu mielde, ja eai buohkat gesso seamma šukŋii. Mii fertet beare vuordit...

Wenche Marie Hætta, Lisboas