Boasttuvuođat mat leat dagahan ahte fertejedje giddet Leavnnja basseaŋga mannan vahkkus, ledje juo fuomášuvvon jagi 2014. Máŋga Porsáŋggu vuoddji fertejit dál mátkkoštit Kárášjohkii go áigot hárjehallat, dan geažil go Porsáŋggu gielddas ii leat oktage basseaŋŋa dál rabas. – Gielda lei sávvan ahte sáhtte divvut boasttuvuođaid nu ahte eai dárbbašan giddet basseaŋŋa, dadjá Porsáŋggu gieldda gielddalašteknihkka ja servvodatovdáneami sektorhoavda, Roger Martinussen.
Norgga álbmoga eanetlohku lea ovtta oaivilis ahte Norgga berre hukset atomarusttega, nu čájeha Opiniona jearahallaniskkadeapmi.
51 proseantta leat ovtta oaivilis ahte berre huksejuvvot atomarusttet. 37 proseantta eai leat ovtta oaivilis das, ja 12 proseantta eai dieđe maid oaivvildit.
– Lea hirpmáhuhtti ahte riikkas gos ii leat árbevierru hukset atomafámu, doppe leat eanet olbmot dál positiivvalačča hukset eambbo atomafámu, dadjá Opinion seniorráđđeaddi Nora Clausen.
Romssa ja Finnmárkku johtolaga fylkaráđđi Kristin Rajala doarju dan go dáhtošedje geahpedit Finnmárkku ja Romssa oanehisgirdišiljuid bileahttahattiid.
Ráđđehus lea Hurdalvuođu bokte lohpidan ahte sii áigot sihkkarastit hálbbit hattiid ja ahte eanet girdit vulget oanehisgirdišiljuin.
Dál ferte ráđđehus dan čuovvolit, čállá Rajala preassadieđáhusas. Son čujuha vel go medias leat maŋemus áiggi muitalan dan ahte girdibileahtat Romssas ja Finnmárkkus leat nu divrasat.
