NRK Meny
Normal

Ivgu sávašii ovttastahttot ránnjá suohkaniiguin

Odne besse Omasvuona, Ivgu ja Gáivuona suohkanstivrrat gullat maid ođđa ovttastahttin raporta cealká. Raporttas boahtá ovdan, ahte leat eanet buorit go heajos bealit jus dát golbma suohkana ovttastahttoše.

Ivgu-, Omasvuona- ja Gáivuona suohkanstivra oktasaš čoahkkimis

Ivgu, Omasvuona ja Gáivuona suohkanstivrrat digaštalle odne leago vejolaš ovttastahttit dán golbma suohkana. Dá Omasvuona sátnejođiheaddji, Knut Jentoft, Gáivuona várresátnejođiheaddji Ludvig Rognli ja Ivgu sátnejođiheaddji Dan Håvard Johnsen.

Foto: Privat

Otná oktasaš suohkastivračoahkkin dán golmma suohkana gaskka galggai buktit eanet dieđuid dan ođđa raportta birra, mas leat eanet buoret go heajut bealit. Dan oaivvilda Ivgu sátnejođiheaddji.

Ivgu oaidná dán buoremus čoavddusin ovttastahttinbarggus

Ivgu ođđa sátnejođiheaddji, Dan Håvard Johnsen, mielas orru buoremus čoavddusin ovttastahttit dán golbma suohkana dan sadjái go ovttastahttot eará suohkaniiguin.

Johnsena mielas lea buoremus doalahit demokratiija Ivgovuonas ja dasalassin doalahivčče almmolaš bargosajiid.

Otná oktasaš suohkanstivrračoahkkin lágiduvvui Čávkkus Omavuonas. Dan Håvard Johnsen oaidná buoret vejolašvuođaid jus Ivgu, Omasvuotna ja Gáivuotna ovttastahttojit.

– Sii sáhttet bággehallat ovttastahttot eará suohkaniiguin, nu ahte danne oainnán buoremus čoavddusin ovttastahttit Omasvuonain ja Gáivuonain, dadjá Ivgu sátnejođiheaddji, Dan Håvard Johnsen.

Gáivuotna hálida sierra suohkanin - Omasvuotna eahpevissis

Gáivuona suohkanstivra lea ovdal juo cealkán ovttastahttinbarggus ahte hálidivččii bissut sierra suohkanin.

Omasvuona mielas soaitá dát leat dohkálaš vejolašvuohta go juo lea sáhka ovttastahttimis.

Ovdal jagi 1930 ledje dát golbma suohkana juo ovttas, Ivgu namas. Go geahččá olmmošlogu hárrái, de leat badjelaš 7.000 ássi oktiibuot dán golmma suohkanis, Framtid i Nord- áviissa dieđuid mielde.