Sámis dáidá leat máilmmi buoremus sadji čuojahit

Halluci Nation nammasaš joavku lea okta dain stuorámus násttiin geat čuojahedje Riddu Riđus dán vahkkoloahpa.

Vaikko sii leat guhká diehtán ahte galge čuojahit dáppe, de ii lean sihkkar ahte ollejedje áiggil.

– Min mátkki deikke ádjánii sullii golbma beaivve. Hástalusat álge SAS-bargoheaitagiin. Dasa lassin mis kansellerejuvvojedje moadde girdi. Dat lea issoras guhkes mátki deikke Torontos!

Riddu Riđđu oiddot sadji čuojahit

Mátki manai lihkká bures, ja Halluci Nation jovde áiggil. Joavku lea molson nama «A Tribe Called Red» namas «Halluci Nation» nammii. Dan sii lohket leat dahkan dannego sin musihka maid lea rievdan áiggi miel.

– Munno mielas Olmmáivággi lea magihkalaš sadji. Vaikko moai čuojahetne birra máilmmi, de lea dát earenoamáš fiinna báiki.

Jos livččiide galgat listtu dahkat dutno oiddot čuojahanbáikkiin, gosa livččiide Riddu Riđu bidjat?

– Riddu gal bijan hui álkit daid golmma bajimus sajiide, lohká Bear.

Tim lasiha ahte son oaivvilda ahte dát lea guovtti buoremus sajiin gos soai leaba čuojahan.

Eamiálbmogiidda lea somát čuojahit

Halluci Nation joavku lea čuojahan Riddu Riđus ovdal. Gávcci jagi leat vássán dan rájes go vuosttaš háve čuojahedje dáppe.

Artistta guovttos lohkaba ahte eaba diehtán gosa leigga jođus vuosttaš háve go čuojaheigga dáppe.

- Mun in ádden manne mii leimmet mátkkoštan máŋga beaivve, ja in diehtán juste gosa leimmet jođus. Lea hui hárve moai čuojahetne ná smávva sajiin.

Soai muitaleaba ahte go oidniidba gáktečiŋahan olbmuid Romssa girdinšiljus, de áddiiga masa leaba boahtán.

– Dan oktavuođa maid oaččut sápmelaččaiguin ja eará eamiálbmogiin dáppe lea hui erenoamáš. Dan dovddu ean oaččo nu máŋga eará sajiin.

Erenoamáš deaivvadeapmi

- Lei hui somá singuin deaivvadit! Lean guhká guldalan sin musihka.

Dan muitala Sara Garen Anne Nilut. Soaittáhaga bokte lea ieš fitnan Kanadas, ja vel stuorát soaittáhaga bokte de lei juste dan guovllus gos Halluci Nation boahtá.

- Dalle go mun ledjen Kanadas ožžon sin CD'a, ja das rájes lean duollet dálle iskan leat go sis ođđa musihka Spotifyas. Lean veahá "starstruck" dál!

Sara Garen muitala ahte Halluci Nation musihkas lea sin árbevirolaš lávlunvuohki, ja dat sulastahttá luođi muhtin láhkai. Son dovdá gullevašvuođa go guldala sin musihka.

- Ieš liikon juoigat. Olmmoš oažžu sierra dovddu dákkár álgoálbmotfestiválas. Don dovddat liekkusvuođa min sápmelaččaid gaskka ja eará eamiálbmogiid gaskka. Dat lea famolaš.