Golmmas leat čađahan máttsámi oahpaheaddjeoahpu
Nord universitehtas leat golmmas čađahan máttasámi vuođđoskuvlaoahpaheaddjeoahpu,
Sii leat vuosttas studeanttat geat dán oahpu leat čađahan, ja geain dál lea sihke formálalaš oahpaheaddjeoahppu ja dasa lassin leat ollesoahppan oahpaheaddjit máttasámegiela fágas.
Sii leat Maajja-Krihke Bransfjell, Vanja Tørresdal ja Ramona Kappfjell Sørfjell.
– Dál gal lean hui ilus ja lea buorre dovdu go lean geargan oahpahusain, lohká Maajja-Krihke Bransfjell.
Máttasámegiella lea sakka áitojuvvon giella ja máttasámegielat oahppan oahpaheaddjit váilot.
– Beroštan hui olu sámi kultuvrras ja gielas. Danne háliidan dahkat dan maid mon sáhtašin, vai mu sámegiella seillošii ja nanusmuvašii, lohká Bransfjell.