Sápmelaš girječálli Marry Ailonieida Somby lea dál čállán mánáidgirjji dárogillii. Iežas lohká dán girjji čállán dalle go váccii girječállioahpu Romssas. Seammás háliidii vásihit makkár dilli dárogiel girječálliin lea.
Ilmmai girjin moatti mánus
Marry Ailonieida Somby illuda dál go lea beassan vásihit dárogielgirječálliid dili, dan ahte sin giehtačállosat almmustuvvet girjin oalle jođánit. Dien dat háliidiige son vásihit.
Girji maid son lea čállán dárogillii lea mánáidgirji. Das leat oanehis teavsttat siidduin, ja olles girjjis leat ivdnás govat, maid Kristina Karlsen Brekke lea sárgon. Teavsttas lea sáhka Gunnar eagis gii lea vuoššamin sovssa, ja girjji namma lea "Onkel Gunnar koker saus".
Olu girjjiid čállán sámegillii
Marry Ailonieida Somby lea Sirpmás eret. Su vuosttaš girji lei «Ámmul ja Alit oarbmealli», ja dát leage dat vuosttaš girji sámegillii mánáide, ja dat almmustuvai 1976:s. Dasto bođii sus girji «Ráiddastallan» 1983:s, «Beaivvaš Nieida» 1990:s, «Uhca stáloš» 1993:s, «Guovžža gazza» ja «Guovssahasa lávla» 1993:s ja «Bajándávgi» 2004:s.
Buot died girjjiid lea son čállán sámegillii, muhtimat dáin leat gal jorgaluvvon dárogillii. Son lea maid čállán teáhterbihtáid. Ja dál lea son vuosttaš heave čállán girjji dušše dárogillii.