Lea dehálaš čuovvolit cuiggodemiid
Sámiráđi jođiheaddji Áile Jávo lohpida bidjat Sámi parlamentáralaš ráđi
kulturlávdegotti geahčadit gean gudni lea sámi leavgga hábmen. Su mielas lea dehálaš čuovvolit cuiggodemiid mat dál bohtet sápmelaš dáiddáris,
gii oaivvilda ahte sámeleavgga "eadni" Astrid Båhl ii berrešii okto oažžut gudni sámi leavgga hábmemis.
Sápmelaš dáiddár Rannveig Persen cuiggodii dan go Astrid Båhl jo fargga 30 jagi lea ožžon gudni sámi leavgga hábmemis. Dán leavgga dohkkehii Sámekonfereansa jagis 1986. – Mu oabbá Synnøve Persen dat ráhkadii dán leavgga. Maŋŋel de bohte diet rieggát levgii, ja dalle dohkkehuvvui sámi leavga almmolaččat, muitala Rannveig Persen. Su mielas ii berrešii dušše Båhl oažžut gudni sámi leavgga hábmemis.
Álgoleavga geavahuvvui sámevuođa čájehit
Sámi álgoleavga ráhkaduvvui measta logi jagi ovdalgo dat sámi leavga, man Båhl hábmii. Álgoleavga geavahuvvui Álttá-stuimmiid áiggi ja maid Stillas, čájehan dihte sámivuođa, muitala Rannveig Persen.
Sámi leavgga «eadni» Astrid Båhl ii mieđit dán kritihka vuoiggalažžan. Son dajai ikte ahte su mielas lea riekta ahte son oažžu dán gudni, danne go son ieš lea tevdnen ja hábmen sámi leavgga.