– Mii eat šaddan gaskaneamet ovtta oaivilii guhte galggai leat stivrrajođiheaddjin, nu ahte dalle gárttai nu ahte eat ožžon Sámedikki beales dan jođiheaddji, dadjá Máret Kirsten Anti Gaup.
Gaup (Bargiid bellodat) lea Sámedikkis válljejuvvon Finnmárkkuopmodaga (FeFo) stivrralahttun. Son lei evttohan iežas stivrrajođiheaddjin, muhto Sámedikki eará stivrralahtu guoktás lei eará árvalus.
– Dat lei nu olu dakkár eahpečielggasvuohta goabbá dat lei dat evttohas dan guovttos. Mun oainnán medias ahte dat ii lean dat gean mun jurddašin lei dat evttohas, dadjá Gaup.
Robertsen joatká jođiheami
Sámedikkis ja Finnmárkku Fylkkadikkis lea goabbáge ásahus válljen golbma stivrraáirasa FeFo stivrii. Juohke jagi válljejit dát áirasat stivrrajođiheaddji. Ulbmilin lea ahte Sámedikkis ja Fylkkadikkis lea vurrolaga jođiheaddji.
Dál livččii leamaš Sámedikki vuorru.
Nu ii šaddan.
– Mii, golbma stivrraáirasa, Sámedikki bealis eat boahtán ovtta oaivilii, ja eanetlohku válljii dalle ahte Raymond Robertsen joatká, čilge Mathis Nilsen Eira.
– Ii livčče vuogas stivrrabargui
Eira lea boazodoalu ovddasteaddji FeFo stivrras, ja goalmmát stivrraáirras Sámedikki bealis lea Máret Guhttor (NSR). Raymond Robertsen (Olgeš bellodat) lei stivrrajođiheaddji ovdal čoahkkima mannan bearjadaga go galggai válljejuvvot stivrrajođiheaddji. Son válljejuvvui fas viđain jienain ovtta jiena vuostá.
– Manne dii ehpet šaddan ovtta oaivilii?
– Dan mun in leat sihkkar mii dasa lea duogážin. Dat ledje guokte evttohasa, Máret Risten Anti Gaup evttohii iežas. Mii earát evttoheimmet Raymond Robertsen, dainna sivain vai eat hehtte stivrra barggu, vástida Eira.
Jus šaddá 3-3 go galget válljet stivrrajođiheaddji, de vállje Sámediggi Finnmárkolága vuođul stivrrajođiheaddji. Ja jus nu šattašii de livččet ferten vuordit dassái go Sámediggi gieđahallá ášši, ja dan ii jáhke Mathis N. Eira livčče lean vuogas.
Ballá duppaljiena ruvkeáššis
Mannan duorastaga ovdal stivrračoahkkima čoahkkinaste Sámedikki FeFo-áirasat ieža. Dán čoahkkimis eai šaddan ovtta oaivilii. Gaup evttohii iežas jođiheaddjin. Eiras ja Máret Guhttoris lei nubbi evttohus. Eira dadjá ahte gean soai evttoheigga ii leat almmolaš.
Gaup ballá ahte Sámediggi dál ii leat seamma nanus FeFos áššiin, main Sámediggi ja Fylkkadiggi leat guovtte oaivilis.
Ovdamearkka dihtii Nussir-ruvkeáššis.
Sámediggi lea vuostá ahte huksejuvvo ruvke Fálesnuorrái. FeFo gis lea cealkán jo, eanetlohku lea leamaš Fylkkadikki bealde danin go stivrrajođiheaddjis lea duppal jietna.
– Sáhttá dál šaddat nu ahte jus stivra galgá oktii vel gieđahallat Nussir-ášši, de sáhttá jođiheaddji geavahit duppaljiena. Ja de mii čohkkát dies ja ášši ii mana viidáseappot gosage, oaivvilda Marit Kirsten Anti Gaup.
Mathis N. Eira ii jáhke dán šaddat duohtavuohtan.
– Nussir-ášši lea jo gieđahallon stivrras. Ja maŋŋá go Sámediggi lea gieđahallan ášši, de boahtá dat mannat njuolgga departementii, ii ge oktii vel FeFo stivrii, oaivvilda Eira.
NRK Sápmi ii leat lihkostuvvon oažžut kommentára Máret Guhttoris dán áššis.