Bergstø čujuhii ahte buot ohppiide berre sihkarastojuvvot dásseárvosaš oahpahus, ja berret fuolahit ahte oahppit besset ja sáhttet searvat ohppiid searvevuhtii, mii sihkarastá ahte statistihkka mii stivre skuvlaovdáneami fátmmasta buot ohppiid skuvllas.
Dásseárvosaš oahpahus dagaha maiddai ahte ohppiin leat dat oahppogirjjit maid sii dárbbašit oahpahusas. Bergstø jearai máhttoministaris maid son ja departemeanta sáhttet dahkat vai doaimmashehttejuvvon ohppiide fállojuvvo seksuálaoahpahus nu movt oahpahuslága mielde galget dahkat.
Vázzit lagasbirrasa skuvllas
Máhttoministtar Torbjørn Røe Isaksen dajai vástádusas Bergstø gažaldahkii ahte buot mánáin ja nuorain lea vuoigatvuohta vázzit lagasbirrasa skuvllas, ja ahte sis maiddái leat vuoigatvuohta oažžut oahpahusa mii lea heivehuvvon sin návccaide ja eavttuide.
Dát mearkkaša oahppit geaidda dábálaš oahpahus ii leat doarvái, lea vuoigatvuohta oažžut earenoamáš oahpahusa. Rød Isaksen deattuha ahte buot ohppiin lea maiddái vuoigatvuohta leat oassin ohppiid searvevuođas.
Máhttoministtar, Torbjørn Røe Isaksen šattai vástidit SG stuorradiggeáirasa , Kirsti Bergstø:ii, maid departemeanttas barget vai sihkkarasttet doaimmashehttejuvvon ohppiid vuoigatvuođaid.
Foto: Ole Gunnar Onsøien (montasje) / NTB Scanpix– Ánssášit buori ja nuvttá oahpahusa
Máhttoministtar dadjá ahte buot oahppit ánssášit buori oahppobirrasa, mii ovddida dearvvašvuođa, čálggu ja buori oahppanbirrasa. Son lohká maiddái dehálažžan ahte oahppit juhkkojuvvojit joavkkuide dahje skuvlaluohkáide, gos eanas oahpahus galgá čađahuvvot.
Máhttoministtar Torbjørn Rød Isaksen dadjá ahte ohppiin galget leat doarvái oahppogirjjit, ja ahte sihke vuođđo- ja joatkkaoahpahus galgá leat nuvttá buot ohppiide. Dát mearkkaša ahte ohppiide galget lea doarvái oahppogirjjit ja digitála oahpporeaiddut maid sii dárbbašit oahpahusas, dadjá máhttoministtar.
Seksuála illásteaddjit
Kirsti Bergstø čujuhii dánska iskkadeapmái, mas boahtá ovdan ahte guhtta oahppi juohke logi oahppis, geat eará mánáid ja nuoraid leat seksuálalaččat illástan, ieža leat erenoamášluohká oahppit.
Bergstø čujuhii doaimmashehttejuvvon olbmuid searvái geat leat cealkán ahte unnán doaimmashehttejuvvon nuorat ožžot seksuála oahpahusa skuvllas. Bergstø ákkastallá ahte ohppiide lea dehálaš oahppat seksualitehta birra, go nu sii ohppet dovdat seksualitehta girjáivuođaid birra, ja movt sii ieža ja earátge mearridit seksualitehta rájá maid earát galget doahttalit.
Dása vástida máhttoministtar, Torbjørn Røe Isaksen, ahte buohkat, sihke doaimmashehttejuvvon oahppit ja earáinge lea vuoigatvuohta oahppat seksualitehta birra.
