NRK Meny
Normal

Elsa Laula Renberg ii hállán mánáidisguin sámegiela

Elsa Laula Renberg lei nisu gii lágidii vuosttaš sámi riikkačoahkkima. Siri Broch Johansen lea sus čállán biografiija. Dát lea ovdal almmustuhtton dárogillii, ja Troandima sámi 100 jagi doaluin almmustuhtto dát girji davvisámegillii.

Elsa Laula Renberg

Elsa Laula Renberg lei nisu gii beroštii sámi áššiin. Erenoamážit barggai son boazosámiid ovddas, ja ásahii maid vuosttaš boazosámiisearvvi Ruoŧas, Lapparnas sentralforbund.

Elsa Laula Renberg lei son guhte lágidii vuosttaš sámi riikkačoahkkima. Sus ii leat olus mihkkege gullon ovdalgo dalle ráhkkanišgohte ávvudit sámi vuosttaš riikkačoahkkima 80 jagi doaluide Troandimis 1997:s. Das rájes lea gullogoahtán eanet dán Ruoŧa beale sámenissonis. Ja dál dat gal juo girjige gávdno maid girječálli Siri Broch Johansen lea čállán Elsa Laula Renbergga birra.

Golai guhkesáigi ovdalgo čálligođii biografiija

Siri Broch Johansen

Siri Broch Johansen lea čállán girjji Elsa Laula Renbergga birra. Logemat jagi smiehtai ovdalgo čálligođii. Girjjjis leat olu dieđut ruoŧa sámi nissonis gii náitalii Norgii ja čohkkestii sámiid dan vuosttaš sámi riikkačoahkkimii.

Foto: Bent Johansen / Pressebilde

Girječálli Siri Broch Johansen muitala iežas guhkes áiggi smiehttan ovdalgo čálligođii Elsa Laula birra girjji. Logemat jagi dat gal golle ovdalgo dovddai iežas gearggusin čálligoahtit. Easka maŋŋil go oinnii teáhterbihtá Elsa Laula birra, de álggii son čállit.

Digitála áigi álkidahtii barggu čohkket dieđuid

Jos son livččii álgán dalle juo go smiehttagođii čállit Elsa Laulas bijografiija, dalle livččii lean mealgat váddásat gávdnat su birra dieđuid. Dien logi jagis buorrániilei digitála-áigi sakka, ja son de sáhtii Deanus čohkkát ja ohcat Elsa Laula Renbergga birra dieđuid interneahtas.

Sámegiella lei giella mii lei dohkálaš boazomeahcis

Girji maid Siri Broch Johansen lea čállán

Dá lea girji maid Siri Broch Johansen lea čállán dárogillii, dál hui farga almmustuhtto dát girji davvisámegillii.

Foto: Vefsn Museum

Girječálli muitala iežas háleštan Thomas Renberggain, dassá lea guhkes áigi, ja son lei dalle juo vuoras almmái. Dalle muitalii Renberg ahte Elsa Laula ii hállán singuin sámegiela, ruovttus hálle sii dáro- ja ruoŧagiela. Sámegiela sii gal hálle dušše boazomeahcis, muhto ii son sáhttán gal muitalit manne nu lei. Soittii lean danne go sii ásse Mussiris, ja sin bearaš lei áidna boazosámibearaš mii ásai dán gávpogis.