Hopp til innhold

Duoguštedje narkotihka 152 geardde

Finnmárkku politiijaguovlu duoguštii narkotihka 152 geardde 2016:s - ja dat lea nuppe dan mađe go ovddit jagi. Finnmárku lea áibbas eará dilis kriposa diimmá narkotihkka- ja dopenstatistihkas go norgga eará politiijaguovllut. Doppe vásihedje ahte duogušteamit unnui veaháš dahje bisui rievddatkeahttá narkotihkkaáššiid dáfus, muhto hášša ja MDMA fuomášumit lassánit.

Korte nyheter

  • Áigot nannet fástadoavtterortnega 

    Ráđđehus nammada áššedovdilávdegotti mii galgá árvalit doaibmabijuid nannen dihte fástadoavtterortnega.
    Ráđđehusa dieđuid mielde badjel 175 000 norgga ássiin ii leat fástadoavttir. Áigumuš dáinna lea ahte juohkehaččas lea fástadoavttir ja ahte fástadoavtterbargu šattašii fas geasuheaddji fágaolbmuide.

    Cuoŋománu 15. beaivve boahtte jagi galgá lávdegoddi buktit sin loahpalaš raportta.

  • Eai dieđe manin luosaid gođđu ii lihkostuva Nuorta-Finnmárkkus

    Norgga luonddudutkaninstituhta dutki Morten Falkegård lea fuolas Nuorta-Finnmárku luossanáliid gođu lihkostuvvamis. Gođđu lea leamašan vássán jagiin hui heittot, muhto sii eai dieđe manin, muitala Falkegård.

    Son joatká, ahte ovdamearkka dihtii Deanočázadahkii leat gorgŋon vássán jagiid uhcán luosat, go buohtastahttá 1990-logu álgui. Ja healkkehahtti unnán smávva luosat leat gorgon čázadahkii. Dál go ii leat luossabivdu Deanočázadagas, de sii eai dieđe mo smávva luosaid dilli lea doppe.

    Sullasaš dilli lea maid eará Nuorta-Finnmárku jogain, muhto son lasiha, ahte riddoguovlluin soaitá leat juoidá dahkamuš gođu lihkustuvamis.

  • Bolesat duoguštedje guokte vuodjinkoartta mannan ija  

    Bolespatrulla duoguštii mannan ija guokte vuodjinkoartta Kvaløyslettas. Goappašagat vujiiga menddo garra fárttain. 20-jahkásaš dievddu vuodjinkoarttas ledje juo dan mađe olu merkejumit, ahte dat bolesat duoguštedje dan. Nuppi nuorra dievddus duoguštuvvui smávva mohtorsihkkela vuodjinkoartta. Boles álggaha ovdadutkamuša dáhpáhusa olis.