NRK Meny
Normal

Dulveeanu sáhttá leat váralaš rasttildit

Guovdageainno eatnu lea dulvan sullii mehteriin ja dát hástala ealgabivdiid ollet bivdoguovlluide.

Josef Per Buljo

Jovsset Biera Buljo lea snihkkemen Jávrrehašmohkis, muhto áigu ihttin vuoddját ealgabivdui.

Foto: Johan Ánte Utsi / NRK

Jovsset Biera ii bálljo astá bargguid siste vuolgit ealgabivdui. Goit ge áigu ihttin dollet meahccái go bivdu álgá.

Muhto dál ii leat nu álki beassát su bivdoguvlui Goarjevárrái, go Guovdageainno eatnu lea dulvan.

– Dákko manai sáttu guhkas dohko. Njealje gitta vihtta mehtera fávlái gokko ii lean čáhci, muitala son.

flom

Sáttogáddi čázevuolde.

Foto: Johan Ánte Utsi / NRK

Balat go dan sihkarvuođas dál go galgabehtet vuolgit?

– Das mun gal balan ja ii goit berre akto vuolgit rastedit jogaid dál.

– Sihkkarvuohta lea bivdiid ovddasvástádus

Finnmárkku opmodat mii hálddaša ealgabivddu Finnmárkkus lea juohkan signála gáibegahpiriid vai sihkarvuohta nannejuvvo.

Jan Henrik Hætta

Jan Henrik Hætta

Foto: Nils John Porsanger / NRK

– Muhto mii eat sáhte váldit ovddasvástádusa movt dálki rievdá ja go jogat dulvet. Dat gal lea juohke bivdi iežas ovddasvástádus, dadjá Fefo gulahallan jođiheaddji Jan Henrik Hætta.

Eatnu lea mehtera dulvan

Guovdageainno suohkana birasossodaga bargi Isak Mathis O. Hætta muitala ahte eatnu lea dulvan sullii mehteriin, nu ahte son ávžžuha bivdiid ohcat lobi vuoddjit máŋgga sajis ovdal vulget bivdoguvlui.

Isak Mathis O. Hætta

Isak Mathis O. Hætta

Foto: Johan Ánte Utsi / NRK

– Dat lea dieđusge suohkana ovddasvástádus maid láhčit vejolašvuođa dainna lágiin ahte ealgabivdit sihkkarit ollejit bivdoguvlui, dadjá son.

Vaikko eatnu lea dulvvas, de áigu Jovsset Biera dollet meahccái.

– Na gal dat gal lea nu ahte ii ahte oro gal bálljo astamen muhto gal ahte ferte gal mannat ovtta mohki nu ahte beassá juoidá eará maid jurddašit.

Guovdageainno eanu ii leat dušše rasttildit ATVain dulvvi geažil.