Gáŋgaviika ovddádusbellodaga suohkanstivraáirras, Johnny Olaussen, dubmejuvvui ja šattai eret oahpaheaddjibarggus Gáŋgaviika suohkanis. Olaussen joatká politihkkariin, ja dadjá ahte vaikko son dikkis ii ceavzán suohkana vuostá, de dat gal ii váikkut su politihkalaš bargui.
Guoddalan suohkana
Johnny Olaussen lei guoddalan Gáŋgaviika suohkana go oaivvildii ahte suohkan su lei eahpeáššálaččat eretcealkán oahpaheaddjivirggis. Dán vahkus vuoittáhalai son diggegottis.
Guoská sutnje priváhta olmmožiin
Olaussen dadjá ahte duopmu guoská sutnje priváhtaolmmožin ja barggu oktavuođas.
–Ii leat politihkar Johnny Olaussen guhte lea leamašan dikkis, dadjá Olaussen.
Lassin suohkanstivraáirasa doibmii, lea Johnny Olaussen Finnmárkku Ovddádusbellodaga politihkalaš nubbijođiheaddji ja bellodaga várreláhttu Finnmárkku fylkkadiggái.
