Njeavdáma giliviessu ja skuvla Mátta-Várjjagis lei spagga dievva go báikki olbmot ja dorvoohccit deaivvadedje duorastateahkeda.
Dorvoohcciid geažil guovllu skuvllamánáid lohku lea lassánan guđa geardde, viđas badjelaš 30 oahppái. Deaivvadeamis mánát ilus čájehedje ja rábmojedje skuvlla.
Rayana (14) mielas lei deaivvadeapmi erenoamáš gelddolaš, go son lei dat guhte beasai sávvat bures boahtima oktasaš deaivvadeapmái, ja dán dagai son dárogillii.
– Giitu didjiide buohkaide geat deike Njeavdáma skuvllii lehket odne boahtán, álggahii son deaivvadeami.
30 ođđa bargosaji
Nuortasámi giláš Njeavdán ealáskii maŋŋá go dorvoohccit bohte deike. Ohppiidlogu lassáneapmi attii máŋga liige bargosaji, seamma dagai dorvoohcciid vuostáiváldinbáiki.
Oktiibuot 30 ođđa bargosaji lea dát gaskaboddosaš vuostáiváldinbáiki buktán gillái.
– Dát lea duođaid leamaš buorrin min báikái, hui somá go gilli lea fas ealáskan, oaivvilda njeavdánlaš Trude Mikkola, gii maid searvvai deaivvadeapmái.
Muhto seamma eahkeda go giliolbmot ja dorvoohccit deaivvadedje mannan vahkus, de bođii diehtu ahte dál dorvoohccit fertejit guođđit báikki, ja fárret eará sajiide Norggas.
Olgoriikalaččaiddirektoráhta, UDI, lea mearridan ahte duorastahkii dat galgá dát gaskaboddosaš vuostáváldinbáiki Njeavdámis gurrejuvvot.
Háliidit bistevaš vuostáiváldinbáikki
– Lea hui váivi go ná šattai, lohká vuostáiváldinbáikki beaivválaš jođiheaddji Heidi Olsen.
Njeavdánlaččat eai dattege vel vuollán. Sii háliidit dorvoohcciid ruovttoluotta.
– Mii leat bargagoahtán dan nammii ahte oažžut bistevaš vuostáiváldinbáikki deike. Mis lea juo leamaš čoahkkin Davvi-Norgga vuostáiváldinguovddážiin ja Mátta-Várjjat gielddain gos almmuheimmet ahte háliidat ohcat dákkáraš lobi, muitala Olsen.
Ii vel dieđe doarjut dán
Mátta-Várjjaga sátnejođiheaddji Rune Rafaelsen ii leat vel dása nu mielas.
– In dieđe vel maid dása galggan lohkat, go eat leat vel gieđahallan dán ášši bellodagas. Muhto mu persovnnalaš oaidnu lea ahte Mátta-Várjjat galgá bissut transittgieldan, iige deike oažžut bistevaš vuostáiváldinbáikkiid, lohká Rafaelsen.
Buorit fálaldagat
Dorvoohcci Amir Farahaddor áinnas háliidivččii báhcit Njeavdámii, ja njuorasmuvvá go NRK jearrá manne lea váivi guođđit báikki.
– Lea váivi guođđit skuvlla gos leat ollu fálaldagat, ja báikki gos mánáin lea buorre dilli, muitala Farahaddor.
Seamma mielas lea Rayan, gii loahpahii sátnesajistis dán láhkai.
– Lean hui giitevaš ja rámis go dáppe lean beassan orrut. Giitu mu oasis!