Les på norsk.

Badjelaš duhát olbmo leat hoahpus gártan guođđit ruovttuideaset guovtti stuorábuš čoahkkebáikkis Alaska oarje-rittus Amerihkás.

Stuorraulli dat bođii orkánain ja čáhceborggain ja dulvadii dáid gilážiid Beringmearragáttis, gos yupik álbmoga árbevirolaš ássanguovlu lea.

Diet lea ávdin guovlu ja USA suodjalus lea girdiiguin fievrredan guovllu ássiid earret eará Anchorage gávpogii Alaskas, mii lea máŋgačuohte kilomehter eret dien guovllus gos roassu deaividii.

Báikkálaš áviisa Anchorage Daily News dieđuid mielde, lea unnimusat okta olmmoš duššan, ja moaddása leat ain ohcamin.

Garra dálki doidilii maid viesuid merrii, ja olu giliássit aiddo dal de besse heakkas.

Inuihtaid organisašuvdna ICC – Inuit Circumpolar Council, lohká dáhpáhusa leat stuorra roassun olbmuide geat leat manahan iežaset ruovttuid.

Sullasaš luondduroasut leat leamaš doppe maŋimuš jagiid, ja dát ge lea stuorra roassun sidjiide geat dál leat gártan viesuid haga ovdalaš go dálvi boahtá, čállá KNR, Kalaallit Nunaata Radioa (neahttsiidu olgoriikas).

Les på norsk.

Sámi Našunálateáhtera Beaivváža, Sámi joatkkaskuvla ja boazodoalloskuvlla oktasaš visti Guovdageainnus lea nominerejuvvon beakkán Mies van der Rohe -bálkkašupmái - EU bálkkašupmi dálááiggi arkitektuvrii.

Visti, man namma lea Čoarvemátta, lea hábmen arkiteaktafitnodat 70°N arkitektur ovttas Joar Nangoin, Snøhettain ja Econorain.

Bálkkašupmi juhkkojuvvo juohke nuppi jagi ja dainna čalmmustahttit Eurohpá arkitektuvrra.

Sámi prográmmaráđis lea digitála čoahkkin dii. 09.00, golggotmánu 17. beaivvi.

Ráđđi gieđahallá váidagiid ja geahččá NRK Sámi válgagokčama. Álggaheapmi prográmmaredaktevrra Mariela Idivuoma ja politihkalaš kommentáhtora Mona Solbakk bokte.

Movt NRK Sápmi doaimmaha guorahallan journalistihka. Álggaheapmi prošeaktaredaktevrra, Robin Mortensen bokte. Mortensen jođiha davvi-regiovnna rogganjoavkku.

Čoahkkima sáhttá geahččat NRK TV:s dii. 23:00.

Les på norsk.

Stáhta geaidnodoaimmahat ávžžuha biilavuddjiid davvin leahkit earenoamáš várrogasat dál maŋŋit čakčat.

Vaikko leat lieggagrádat, de sáhttá geainnu alde leat minusgrádat. Lávttadagas sáhttá čáhci jikŋot ja geaidnu sáhttá šaddat hui gálja, nu čállá Stáhta geaidnodoaimmahat preassadieđáhusas.

Otná beaivvi rájes lea lohpi vuodjit biikadeahkain golbma davimus fylkkain.

Stáhta geaidnodoaimmahat čállá ahte dálvi lahkona dál, iige leat viera vuordit deahkaid molsuma. Dalle go muohttágoahtá, soaitá leat jo beare maŋŋit.

Les på norsk.

Finnmárkkuopmodat dieđiha ahte Finnmárkkus leat báhčon 576 ealgga dán rádjai dán jagi.

Guovdageainnus ja Kárášjogas álggii bivdu čakčamánu 1. beaivvi, muđui fylkkas fas čakčamánu 25. beaivvi.

Deanus leat báhčán eanemus ealggaid. Oktiibuot leat Deanu gielddas báhčán 121 ealgga maŋŋel go bivdu álggii čakčamánu 25. beaivvi. Oktiibuot lea Deanus lohpi bivdit 170 ealgga.

Kárášjogas leat báhčán nubbin eanemus ealggaid. Dán rádjai leat gielddas báhčán 109 ealgga, ja gieldda ollislaš earri lea 168 ealgga.

Sihke Bearalvágis ja Báhcavuonas lea oktiibuot lohpi báhčit 10 ealgga ja dál leat goappáge gielddas báhčán 9 ealgga.

Oktiibuot Finnmárkkus lea lohpi báhčit 840 ealgga.