Boazodoallit eddon ministtárii

Guovdageainnu Johttisámisearvi gáibida eana- ja boazodoalloministtára bohttit ieš boazosápmelaččaiguin gullat boazodoalu duohta dilis, dalle ii giellásiid gilvve ealáhusa birra, nu čállá searvi preassadieđáhusastis.

Nils Mathis Sara
Foto: Mette Ballovara / NRK

Ášši doaimmaheaba Marie Elise Nystad ja Ánne Olli

Ášši doaimmaha Marie Elise Nystad

Guovdageainnu Johttisámisearvvi preassadieđáhus

Boazodoalloministtáris Lars Peder Brekk ii ádde boazodoalus maidige, iige son dieđege das maidige. Su čuoččuhusat dat dovddahit ahte son ii dieđe boazodoalus ii maidige.

Danne oaivvilda Guovdageainnu Johtisápmelaččaid searvi ahte dan maid Brekk lea dadjan mediaide leat giellásat, ja ahte sus ii leat makkárge fágalaš vuođđu cealkit nu go lea cealkán mediain.

Eanadoallomiisttáris leat čuorbbes ráđđeaddit, danne go eai sis leat riekta dieđut Finnmárkku njuovvandilis, vai leaš go nu ahte Brekk vigga iežas čoavdit ovddasvástádusas go sivahallá boazosápmelaččaid.

Guovdageainnu Johtisámisearvi lea ovttas eará boazoeaiggádiiguin Oarje-Finnmárkkus viggan juo 2003 rájes árvalit ahte mo sáhtašii čoavdit njuovvamiid ja sii leat maid bivdán Boazodoallohálddahusa ja Eanadoallodepartemeantta álggahit sierranaš doaimmaid čoavdindihtii njuovvan vejolašvuođa. Dađibahábut ii leat stáhta váldin sin duođas dán áššis.

Sii imaštallet manne Lars Peder Brekk čuoččuha ahte boazoeaiggádat eai dáhtošii vuolidit boazologu, dilli han lea nu ahte priváhta njuovahagat eai váldde boazodolliin bohccuid njuovvamii.

Boazodoalloealáhus doaibmá, muhto go dilli lea nu ahte boazodollit dárbbašit priváhta njuovahagaid buorredahtolašvuođa njuovvat sin bohccuid, na de šaddá boazodolliide váddásis dilli.

Guovdageainnu Johtitsápmelaččaid searvi bivdá Lars Peder Brekk johtileapmosit boahtit Oarje-Finnmárkui viežžat sis, boazosápmelaččain dieđuid boazodoalu beaivválaš dilis. Sii eai šat dohkket su čuoččuhusaid jaeaige dohkket mo son skuožurda boazodoalloealáhusa mediain.

Eai searvva ovdačoahkkimii

Guovdageainnu Johttisámisearvvi jođiheaddji Nils Mathis Sara ii loga iežaset šat atnit vearan searvat čoahkkimii gos iešguđetge boazodoalloguovlluid ovdaolbmot galggašedje buktit árvalusaid boazodoallošiehtadallamiidda.

Dan lohká danne go iežaset lohká čieža jagi juo árvalan ja buktán ovdan maid sii dáhtošedje váldit mielde boazodoallošihtadallamiidda, muhto eai sii leat olahan dáid árvalusaiguin eai gosage. Sara ii loga NBR` máhttit šiehtadallat, eai sii gulahala státain.

Gáibidit sierra šiehtadalli

Nils Mathis Sara lohká gal ahte orru leamen nu ahte sin, Guovdageainnu johtisámisearvvi oaivilat ollásit jávket go eai searvva buktit oainnuid ja árvalusaid, muhto sii dat leat dat stuorimus searvi, danne galggašedje gullat sin.

Muhto dál sii eai vuolgge ovdaságastallamiidda ovdalgo NRB skáhppo oahppan olbmo šiehtadallandoibmii. Ja dát olmmoš galgá ieš searvat ovdačoahkkimii, vai ieš gulla maid boazosápmelaččat dahttot váldit ovdan šiehtadallamiin stáhtain.