Lei historjjálaš duopmu mii celkui Alimusrievttis golggotmánus jagi 2001.
Norgga stáda vuoittáhalai Olmmáivákki vuostá, duomus celkui ahte olmmáivággilaččain lei sihke geavahanriekti ja oamastanvuoigatvuohta Čáhput- guovllus.
Lei sáhka 116 km² viidosaš guovllus gos olmmáivággilaččat ledje áiggiid čađa bivdán, murren, murjen ja eará luonddu riggodagaid viežžan ja ávkkástallan.
Áŋgirušai áššis
NRK Sámi politihkalaš kommentáhtor, Mona Solbakk, muitá bures movt Bjørn Inge Mo áŋgirušai Čáhput-áššis.
– Son lei hui nuorra dalle, lea ovdal go šattai guovddáš politihkkárin. Son čohkkii giliolbmuid ja dáistaledje Norgga stádain olu jagiid, dassái go ášši joavddai Alimusriektái, Lei vuosttaš geardi go sámi eanan dohkkehuvvui Norggas, ahte sápmelaččat ieža eaiggádušše nie viiddis guovllu.
Mona Solbakk orru Gáivuona suohkanis, Bjørn Inge Mo ruovttusuohkanis.
Foto: NRK
Šattai guovddáš politihkkárin
2003 beasai Bjørn Inge Mo Gáivuona sátnejođiheaddjin, son čohkkái sátnejođiheaddjin 2015 rádjái.
Son lei maid Tromssa bargiidbellodaga jođiheaddjin 2005-2014 áigodaga. Ja 2017 válljejuvvui son Sámediggái, gos oaččui virgelobi go šattai Romssa ja Finnmárkku fylkkaráđđejođiheaddjin 2019 rájes.
Bargiidbellodaga politihkkár ja dál stáhtačálli, Johan Vasara, muitá bures man siivos olmmoš Bjørn Inge lei.
Johan Vasara maid geassá ovdan Bjørn Inge Mo mearkkašumi Čáhput-áššis.
Stádaministtar morrašis
Norgga stádaministtar, Jonas Gahr Støre, čálii sotnabeaivvi iežas Facebookas Bjørn Inge Mo jápmasága birra, earet eará čállá Støre:
Politihkas don deaivvat olbmuid, geat mearkkašit olu dutnje iešguđetge ládje. Bjørn Inge lei mus buorre olmmái. Son lei rehálaš, oskkáldas ja áicil. Sutnje sáhtten riŋget ja oažžut buriid rávvagiid. Liekkus ja jierbmás olmmái, gean gal ohcalan hirbmosit.
Bargiidbellodat lea dál morrašis, ja min jurdagat leat Bjørn Inge Mo lagamusaid luhtte.
Stádaministtar Jonas Gahr Støre ja Bjørn Inge Mo. Govas maid lea Nils Ove Foshaug (gasku).
Foto: Lars Egil Mogård / NRKOahpai sámegiela
Bjørn Inge Mo ii hupman sámegiela mánnán, dáruiduhttin lei garas su bearrašis. Muhto son ieš oahpai sámegiela rávisolmmožin. Sámediggepresideanta Silje Karine Muotka muittaša movt Bjørn Inge lávii sámástit go deaivvadeigga.
– Háliidan geassit ovdan dan movt Bjørn Inge áŋgirit oahpai sámegiela rávisolmmožin. Son lávii sámástit go mii politihkkárat deaivvadit.
Silje Karine Muotka (sámediggepresideanta) ja Bjørn Inge Mo (Romssa ja Finnmárkku fylkkaráđijođiheaddji) vuolláičálliga Sámedikki ja Romssa ja Finnmárkku fylkasuohkana gaskasaš ovttasbargošiehtadusa. Dat dáhpahuvvai miessemánus dán jagi.
Foto: Håkon MudeniaMuotka lea maid ieš oahppan sámegiela rávisolmmožin.
NRK Sámi kommentáhtor Mona Solbakk namuha dan seammá go Muotka.
– Álggos go oahpásnuvven Bjørn Ingein, dalle dárusteimme. Muhto maŋemus jagiid láviime sámástit go deaivvadetne. Sus lei šaddan buorre sámegiella, dadjá Solbakk.
Gáivuona áhčči
– Mii leat stuora morrašis, dál mii jurddašat eanemusat Bjørn Inge oapmahaččaid birra geat leat massán iežaset áhči. Vaikko Bjørn Inge mátkkoštii olu de goitge son áimmahušai iežas bearraša hui bures, dadjá Gáivuona sátnejođiheaddji Bernt Eirik Isaksen Lyngstad.
Sátnejođiheaddji mielas mearkkašii Bjørn Inge hui olu Gáivutnii.
– Measta dajašin ahte son lei Gáivuona áhčči, ii dušše dego politihkkárin muhto maiddái olmmožin. Son álohii oinnii ja beroštii sis, geat rahčet ja geain ii leat nu buorre dilli.
