Bisma ráŋgu su – ii šat oaččo oahpahit konfirmánttaid

Guovdageainnu suohkanbáhpa Bjarne Gustad garra sártnis konfirmánttaide leat váikkuhusat. Bisma sirdá konfirmántaoahpahusa eará báhpa háldui.

Bjarne Gustad

CUIGGODUVVO: Davvi-Hålogalándda bisma Olav Øygard ráŋggášta Guovdageainnu suohkanbáhpa Bjarne Gustad. Gustad ii šat beasa suohkana nuoraide leat konfirmántaoahpaheaddjin.

Foto: Marie Elise Nystad / NRK

– Dát ii lean álkes mearrádus go báhpain lea dábálaččat stuorra friddjavuohta go sárdnidit, dadjá Davvi-Hålogalándda bismagotti bisma Olav Øygard NRK:i.

Øygard dat lea ieš mearridan ahte diet oahpahus ii galgga leat šat suohkanbáhpa hálddus.

Konfirmántasártnistis Máze girkus borgemánu loahpas, Gustad dubmii náitalkeahtes páraid, earráneami, abortta, sohkabealemolsuma ja homofiillaid.

Olles Norga gulai sártni

Koronaráddjemiid geažil lei neahta bokte vejolaš čuovvut Gustad konfirmántasártni.

Olav Øygard

NOAĐĐIN NUORAIDE: Davvi-Hålogalándda bismagotti bisma Olav Øygard lohká Gustad sártniinis loavkašuhttán nuoraid.

Foto: Den norske kirke

Nu bessege máŋga duhát olbmo gullat dan, eai dušše sii, geat ledje Máze girkus.

Sárdni bovttii garra digaštallama. Olbmot miehtá Norgga ledje hirpmástuvvan go gulle Gustad guhkes listtu das mii su mielas lea suddu.

– Go miehtá riikka bohte cuiggodeamit maŋŋá dien sártni, de lei vuoiggalaš sirdit boahtte jagi konfirmántaoahpahusa eará báhpa háldui, lohká Øygard.

Oaivvildat go ahte dan maid son dadjá ii livčče nu hirpmástuhtti, jos eai livčče nu olus gullamin sártni?

– Ii nu gal leat. Sártnis šattai stuorát váikkuhus go nu olu olbmot gulle dan. Muhto ii sártni sisdoallu šattašii eanet riekta, jos dušše moattis ledje gullat dan, lohká Øygard.

– Čuohcá go bisma ná ráŋgu mu

Sis-Finnmárkku proavás Egil Lønmo dat galgá dás duohko oahpahit Guovdageainnu konfirmánttaid.

Son lea báhppan Kárášjogas, ja lea eanet liberála báhppa go Gustad.

Dát rievdadus ii leat áibbas vuorddekeahttá, dovddaha Bjarne Gustad. Su mielas lea gal heahpat ja váivi cuiggoduvvot bismii.

– Dát čuohcá munnje go bisma ná ráŋgu mu. Muhto in sáhte nu olu smiehttat dán birra. Ferten doaibmat báhppan dan vuogi mielde mii mu mielas lea riekta. Munnje lea dehálaš sárdnidit biibbala sániid bienasta bitnii, lohká Gustad.

Sokneprest Bjarne Gustad i Masi kirke

II GÁĐA: Guovdageainnu suohkanbáhppa Bjarne Gustad ii gáđa sániidis konfirmántaipmilbálvalusas Máze girkus borgemánu 23. beaivvi.

Foto: Skjermdump / Guovdageainnu Lagasradio

Su mielas lea sus geatnegasvuohta báhppan sárdnidit Ipmila sáni čielgasit. Dattetge mieđiha ahte lei sáhttit eará sániid geavahit dan beakkán Máze-sártnistis.

– Olmmoš berre álo čájehit vuollegašvuođa, go juohkehaš sáhttá meaddit. Soaitá leat nu ahte ledjen sáhttit eará láhkai dadjat osiid dien sártnis. Muhto oppalaččat oaivvildan buot maid dadjen, lohká Gustad.

Loavkašuhtii nuoraid

Øygard ii leat ovtta oaivilis Gustadain.

Su mielas suohkanbáhppa iežas cealkámušaiguin lea bidjan nuorra olbmuide lossa noađi.

Dáid fáttáid birra sáhttá dieđusge hállat konfirmánttaiguin, muhto suohkanbáhpa garra vuohki mo dan dahkat, dat loavkašuhtii nuoraid, lohká Øygard.

Son muittuha ahte go dákkár sánit daddjojit girku sárdnestuolus, de sáhttá olmmoš áddet dán njuolgga cuiggodeapmin sutnje guhte lea gullamin sártni girkus.

– Ná sáhttá olmmoš dulkot sártni sisdoalu, vaikko dat ii dáidde leat oaivvilduvvon cuiggodeapmin, lohká Øygard.

Gievrras nuorat

Gustad ii jáhke iežas baldit nuoraid boahtimis girkui.

– Jáhkán baicca ahte ášši lea nuppe láhkai. Nuorat girdet eanet go maid mii navdit, muhto fertejit beassat gullat Ipmila sáni čielgasit, lohká Gustad.

Gustad lea logi jagi leamaš báhppan Guovdageainnus. Son joatká iežas ámmáhis vaikko vel ii dál beasage šat leat oahpaheaddjin konfirmánttaide.