Čájáhusa čohkkejeaddji, Lill-Aina Steffenach, lea galledan ollu máilmmi álgoálbmogiid ja etnihkalaš čearddaid geat bearraliiguin čevllohallet ja geavahit daid iežaset iešdovddu nannemii.
Erenoamáš čoakkáldat
– Čoakkáldagas leat ollu iešguđege lágan bearalduojit mat gávdnojit ollu sajiin
máilmmis, álgoálbmogiid ja eará álbmogiid searvvis, geat ain eležit árbevirolaččat, muitala Steffenach.
Bearalgárvvut
Čájáhusas leat ovdamearkka dihtii earret eará amerihká indiánaid čiŋat, inuihtaid - ja maiddái mátta-afrihkálaččaid čiŋat, nu go zulučeardda, masa gullet 11 miljon olbmo.
– Zuluálbmot lea stuorra čearda Mátta-Afrihkás, muhto go soađáskedje gaskaneaset, de bieđganedje iešguđege guvlui.
Sii eai báljo geavat dábálaš biktasiid. Sin gárvvut leat dadjat dušše bearralat.
Mátta-Sápmái
Oppa Sámis leamaš bearalgeavaheapmi eanet dábálaš ovdalis go dal, muittuhan son.
– Máttasámiid gaskkas vuoittahalle bearralat datnečiŋaide, muhto dál orrot bearralat fas máhccamin.
Máttasápmelaš, Laila Mari Brandsfjell, lei maid čájáhusa geahččamin ja son lohká iežas guovllus bearalgeavaheami oahpisin:
– Mun gal lean ieš bajásšaddan bearraliiguin máttasámi guovllus, nu ahte dán anán mun hui miellagiddevažžan ja somán oaidnit.
Viiddidan miella
– Háliidivččen čohkket vel eanet čiŋaid, eanet kultuvrrain, ja lihkus lea beroštupmi olgoriikka museain gos lean leamaš. Mu mielas lea dehálaš čájehit mii lea ealli
kultuvrra, ja oasttášin áinnas áđaid maid nissonat dál ain ráhkadattažit iežaset atnui, loahpaha Steffenach.
Steffenacha beroštupmi iežas ja amas kultuvrraide, dat leat vuolggahan jurdaga čájáhussii. Su viiddis mátkkošteapmi máilmmi álgoálbmogiid ja eará álbmogiid mielde, dat leat addán dán bohtosa maid dál fállá olbmuide čájáhusnamas.
Muđui lea son dán ovdal čállán sierra girjji ollu birra mat gávdnojit máilmmis.
Johtittičájáhus
RiddoDuottarMuseaid jođiheaddji, Karen Elle Johansdatter Gaup, dat rabai čájáhusa Guovdageainnu gilišiljus mannan lávvardaga.
– Dát johttičájáhus lea dušše Guovdageainnus dáppe Davvin ja galgá dán maŋŋá Rørosii ja de vel olgoriikii, muitala Gaup.
